Oralda M. Rahmetovany eske alýǵa arnalǵan respýblıkalyq týrnır márege jetti
ORAL. QazAqparat - Oral qalasynda sambo kúresinen álem birinshiliginiń qola júldegeri Meıramgúl Rahmetovany eske alýǵa arnalǵan 2003-2004 jylǵy jasóspirimder arasynda respýblıkalyq týrnırdiń jeńimpaz-júldegerleri belgili boldy, dep habarlaıdy «QazAqparat» tilshisi.
Sambodan qyzdar arasynda BQO quramasynyń aǵa jattyqtyrýshysy, jarystyń bas hatshysy Almıra Isataevanyń aıtýynsha, bıyl úshinshi ret uıymdastyrylǵan dástúrli týrnırge Oral men BQO-nyń barlyq aýdandarymen qosa Astana, Almaty qalalary men Shyǵys Qazaqstan, Atyraý, Aqtóbe, Mańǵystaý oblystarynan jáne Reseıdiń Orynbor oblysy Sol-Iletsk aýdanynan barlyǵy 250 jas palýan qatysyp, baq synady.
Jarys qorytyndysynda qyzdar arasynda salmaq dárejelerine qaraı Eleonora Anarbek (34 kg, Oral, sportınternat), Ásem Berikqyzy (37 kg, Almaty oblysy), Shahnoza Koshanova (40 kg, Orynbor oblysy, Sol-Iletsk), Maırash Jalǵasbaeva (43 kg, Oral, №4 BJSM), Indıra Egizbaı (47 kg, BQO, Terekti aýdany), Aıaýlym Tókenova (51 kg, ShQO), Aıdana Jarbolova (55 kg, Almaty oblysy), Zarına Ońǵarbaeva (59 kg, BQO, Terekti aýdany), Elnara Bıǵalıeva (65 kg, BQO, Zelenov aýdany), Kórkem Saǵyndyqova (+65 kg, Mańǵystaý) chempıon atandy.
Uldardan Azat Amansúgirov (35 kg, BQO, Syrym aýdany), Qazbek Ańsaǵan (38 kg, Atyraý oblysy), Aıbar Asqarov (42 kg, Oral, jekpe-jek sporty túrlerinen olımpıada rezerviniń mamandandyrylǵan balalar men jasóspirimder mektebi), Dilmuhamed Súıinish (46 kg, Astana), Sanjar Qyzaıbel (50 kg, Almaty oblysy), Nursultan Zaızaǵalıev (54 kg, Oral, sport ınternaty), Taıman Nurǵalıev (59 kg, sport ınternaty), Álı Іzbasar (65 kg, Syrym aýdany), Álıhan Ádilov (71 kg, ShQO), Denıs Krashanının (+71 kg, sport ınternaty) top jardy.
«Meıramgúl Qanatqyzynyń ómiri qysqa bolsa da, el namysyn abyroımen qorǵap, sambodan álem chempıonatynyń qola júldegeri atanyp úlgerdi. Dertke shaldyǵyp, 2011 jyly 16 jeltoqsanda nebári 25 jasynda ómirden ozǵan Meıramgúl kórkine aqyly saı, óte qarapaıym edi. Tiri bolsa, talaı belesti baǵyndyrary anyq edi», - dedi «QazAqparat» tilshisine kezinde ózi de kúresip, sambodan álem birinshiliginiń qola júldegeri atanǵan A.Isataeva.
