Oralda lagerde balanyń soqqyǵa jyǵylýyna baılanysty tálimger qyzmetinen bosatyldy
ORAL. KAZINFORM – Oralda «Atameken» qalalyq balalar-jasóspirimder týrızmi jáne ekologııa ortalyǵynda balanyń soqqyǵa jyǵylýyna baılanysty tálimger qyzmetinen bosatyldy.
Balanyń ákesi áleýmettik jelide jazǵanyndaı, 10 jasar uly lagerde 5 kún bolǵanda, úsh kún boıy taıaq jegen.
BQO polıtsııa departamentiniń baspasóz qyzmetinen málim etkenindeı, atalǵan derek 15 maýsym kúni Oral qalasy polıtsııa basqarmasynda tirkelgen.
«Sonyń aıasynda polıtsııa qyzmetkerleri oqıǵaǵa qatysy bar adamdardy jáne janjaldyń shyǵý sebepterin anyqtaý maqsatynda is-sharalar júrgizdi. Qazirgi kezde sot-medıtsınalyq saraptama taǵaıyndaý týraly qaýly shyǵaryldy. Sonyń qorytyndysy negizinde oqıǵaǵa zańdyq baǵa beriledi. Tekserýdi uıymdastyrý maqsatynda Oral qalasy bilim berý bólimi atyna uıǵarym berildi», dep habarlady vedomstvodan.
BQO bilim basqarmasynyń naqtylaýynsha, kámeletke tolmaǵandar arasynda tárbıe jumystaryn durys júrgizbegeni úshin otrıad vojatyıy men tárbıeshige tártiptik shara qoldanyldy. Vojatyı qyzmetinen bosatyldy. Oral qalasy bilim berý bóliminiń buıryǵymen qyzmettik mindetin oryndaý barysynda salǵyrttyqqa jáne jazǵy lagerde ishki tártip erejelerin saqtaý men balalar qaýipsizdigin qamtamasyz etýde kemshilikterge jol bergeni úshin «Atameken» qalalyq balalar-jasóspirimder týrızmi jáne ekologııa ortalyǵynyń dırektoryn mindetin atqarýshy sógis túrindegi tártiptik jaýapkershilikke tartyldy.