Oralda qyzdy tunshyqtyryp óltirgen turǵyn uzaq merzimge sottaldy
ORAL. QazAqparat - Oralda qyzdy tunshyqtyryp óltirgen A.Besshtanov uzaq merzimge sottaldy, dep habarlaıdy QazAqparat tilshisi.
BQO qylmystyq ister jónindegi mamandandyrylǵan aýdanaralyq sottan túsken málimetke qaraǵanda, oqıǵa ótken jyly 29 qazanda bolǵan.
Saǵat 19.00 shamasynda Jańaqala kóshesi 2/2-úıde araq ishý barysynda A.Besshtanov ıntımdik qyzmet kórsetetin A.Aqbolatovamen sózge kelgen. Talas A.Aqbolatovanyń birge ótkizgen ýaqyty úshin aqsha talap etýinen týyndaǵan.
A.Besshtanov A.Aqbolatovanyń betinen uryp, edenge qulatqan. Odan keıin sol aıaǵynyń tizesimen qyzdyń moınynan basyp, sonymen birge qolymen aýyz-murnyn jaýyp, tórt mınýt boıy ustap turǵan. Sonyń saldarynan A.Aqbolatova oqıǵa ornynda qaza tapqan.
Sosyn sottalýshy qyzdyń kıimin sheship, aýlaǵa aparyp, órtep jibergen. Múrdesin jaımaǵa orap, ájethanaǵa tastaǵan.
Sot A.Besshtanovty QR QK 99-baby 1-bóligine sáıkes (kisi óltirý) aıypty dep tanyp, 13 jylǵa bas bostandyǵynan aıyrdy. QR QK 60-baby negizinde 2016 jylǵy 30 qyrkúıektegi sot úkimi boıynsha 6 aıǵa bas bostandyǵynan aıyrý jazasy qosyldy.
Sóıtip ol túpkilikti 13 jyl 6 aıǵa bas bostandyǵynan aıyrý jazasyn qaýipsizdigi tótenshe qylmystyq-atqarý júıesi mekemesinde óteýge sottaldy.
Sottalýshy májbúrli túrde maskúnemdikten emdeletin boldy. Aleksandr Besshtanov oǵan qosa qyzdyń anasyna 3,5 mln teńge moraldyq jáne 415 myń teńge materıaldyq shyǵyndy óteıdi.
Sot úkimi zańdy kúshine engen joq.
