Oralda qyzdy qaǵyp, qashyp ketken júrgizýshi eki aıǵa qamaýǵa alyndy
ORAL. QazAqparat – Oralda 10 jasar qyzdy qaǵyp, qashyp ketken júrgizýshi eki aıǵa qamaýǵa alyndy, dep habarlaıdy QazAqparat tilshisi.
BQO sotynyń baspasóz qyzmetinen túsken málimetke qaraǵanda, mamandandyrylǵan tergeý soty Valerıı Petrýnındi eki aıǵa qamaýǵa alý týraly anyqtaýshynyń ótinishin qanaǵattandyryp, sanktsııalady.
V.Petrýnın QR QK 345-baby 3-bóligi (abaısyzda adam ólimine soqtyrǵan jol erejesin buzý) jáne 347-babyna (jol-kólik oqıǵasy bolǵan jerden ketip qalý) sáıkes aıyp taǵyldy.
Kúdikti 20 qarasha kúni «Aýdı A6» avtokóligimen jaıaý júrginshi jolaǵymen ótip bara jatqan jasóspirim qyzdy qaǵyp, qylmystyq jaýapkershilikten jaltarý maqsatynda oqıǵa ornynan qashyp ketken.
Oǵan qosa kólik quralyn basqarýǵa quqyǵy bolmasa da, V.Petrýnınniń avtokólikti turaqty aıdap júrgendigi anyqtaldy. Sol úshin kóptegen ákimshilik jazaǵa tartylǵan. Sonymen qatar oǵan mekenjaı orny boıynsha teris minezdeme berilgen.
Sot qaýlysy zańdy kúshine engen joq.
Eske sala keteıik, budan buryn Oralda 10 jasar qyzdy qaǵyp, qashyp ketken júrgizýshiniń ustalǵanyn, keıin onyń súıegin shatastyryp, basqa bireýlerge berip jibergenderdiń jaýapqa tartylǵanyn jazǵan bolatynbyz.
Sondaı-aq osy oqıǵaǵa baılanysty Oral qalasy ákimine sógis jarııalandy.
