Oralda qysqy prezıdenttik kópsaıystan el chempıonaty márege jetti
ORAL. QazAqparat - Oralda Qazaqstannyń eńbek sińirgen jattyqtyrýshysy Aleksandr Korovındi eske alýǵa arnalǵan qysqy prezıdenttik kópsaıystan QR chempıonaty márege jetti, dep habarlaıdy «QazAqparat» HAA tilshisi.
BQO dene shynyqtyrý jáne sport basqarmasynan túsken málimetke qaraǵanda, birinshilikke qatysýshylar pnevmatıkalyq vıntovkadan nysana kózdeý, kúshtik gımnastıka jáne shańǵy jarysynan synǵa tústi.
Chempıonat qorytyndysynda BQO quramasy jeńimpaz atansa, qaraǵandylyqtar ekinshi, qostanaılyqtar úshinshi oryndy ıelendi.
«Aleksandr Korovın ómir boıy oblystyq balalar men jasóspirimder sport mektebinde eńbek etip, qysqy prezıdenttik kópsaıystan balalardy jattyqtyrdy. Bul joly birinshilikke BQO, Qaraǵandy, Qostanaı jáne Aqtóbe oblystarynan barlyǵy 45 sportshy qatysty. Jyldyń basynda qarjylandyrý bolmaǵannan keıin keıbir oblystardyń komandalary kele almady. Endi 1-5 aqpan aralyǵynda qysqy prezıdenttik kópsaıystan oblystyq birinshilik ótip, tańdaýlylar anyqtalady. Qysqy sport túrlerin damytý maqsatynda mundaı jarystar aldaǵy ýaqytta da uıymdastyrylmaq», dedi «QazAqparat» tilshisine qysqy prezıdenttik kópsaıystan BQO quramasynyń aǵa jattyqtyrýshysy Nurbek Imanǵalıev.
