Oralda qysqy Azıadaǵa oraı baıqaý jarııalandy
ORAL. 10 qańtar. QazAqparat /Eljan Eraly/ - Oral qalasynyń www.infoportal.kz aqparattyq-anyqtamalyq saıty oblystyq týrızm, dene shynyqtyrý jáne sport basqarmasy,
«Jaıyq Press» JShS, oblystyq «Oral óńiri», «Prıýrale» gazetteriniń qoldaýymen qatarynan tórt baıqaý jarııalady. Úsh baıqaý Almaty men Astanada ótetin qysqy Azııa oıyndaryna qatysty, al tórtinshisi «Moı stıl» dep atalatyn baıqaý, onyń demeýshisi «SELA» kıim jáne aksessýarlar dúkeni.
30 qańtarda elordanyń «Astana-Arena» stadıonynda VII qysqy Azııa oıyndary saltanatty jaǵdaıda ashylyp, tarıhta tuńǵysh ret Qazaqstan Azıadanyń Otanyna aınalatyny málim.
Baıqaýdy uıymdastyrýshylar Azıadany ótkizý Qazaqstan úshin úlken mereı ekendigin tereń túsinip, sportty nasıhattaýǵa arnalǵan memlekettik saıasatty qyzý qoldaıdy. Elbasy Joldaýynda qazaqstandyqtardyń 30 paıyzǵa jýyǵy buqaralyq sportqa tartylýy tıis dep atap ótkeni belgili.
Azıadany óz kózimen kórýdi armandamaıtyn adam joq shyǵar. www.infoportal.kz saıty daryndy prozashylarǵa osyndaı múmkindik berip otyr. Olar «Men úshin Azıada - 2011 nesimen mańyzdy» degen taqyrypta esselerin qazaq jáne orys tilderinde jazyp joldaı alady. Úzdik esse avtorlary Azıada joldamasyna ıe bolady. Qazaq tilinde jazylǵan jeńimpaz esse avtory Astanaǵa, al orys tildi jeńimpaz Almatyǵa sapar shegedi.
Azıadaǵa arnalǵan kelesi baıqaýdyń ataýy - «Ne? Qaıda? Qashan?» sporttyq vıktorınasy. Sport bilgirlerine saıtta birneshe kún boıy 50 suraqqa jaýap berý usynylady. Birinshi bolyp jaýap berip, kóp daýys jınaǵan adamǵa júlde retinde bir aı Oraldaǵy muz aıdyny sport saraıyna tegin kirý abonementi tapsyrylady. Baıqaý sharttarymen www.infoportal.kz saıtynyń «Baıqaý» bóliminen tanysýǵa bolady.
Azıadaǵa baılanysty úshinshi konkýrs -balalardyń ashyq sýret baıqaýy. Bul baıqaý jyl boıy jalǵasyp, jeńimpazdar kezeń-kezeńimen marapattalyp otyrmaq. Balǵyn sýretshilerge usynylatyn alǵashqy taqyryp - Qysqy sport. www.infoportal.kz saıtynyń ustanǵan bir baǵyty - saýda úılerimen jáne fırmalyq dúkenderimen baılanys. Sonyń birinshisi - «SELA» kıim jáne aksessýarlar dúkeni usynǵan «Moı stıl» baıqaýy. Dúken stıldi kıingen jasqa 10 myń teńgelik syılyq sertıfıkatyn tapsyrýǵa daıyn. Saıt versııasy boıynsha stıldi adam saıtqa qatysýshylardyń bergen daýysymen jáne dúken ákimshiligimen anyqtalady. Baıqaý 15 qańtarda bastalady.
