Oralda Qylmystyq-atqarý júıesi komıtetiniń departamentinde memlekettik tilden ashyq sabaq ótti
ASTANA. Qyrkúıektiń 20-sy. QazAqparat /Ǵalymjan Hasenov/ - Búgin Oralda Qylmystyq-atqarý júıesi qyzmetkerleriniń arasynda qazaq tilinen konkýrs jáne memlekettik til boıynsha ashyq sabaq ótti, dep habarlady Qylmystyq-atqarý júıesi komıtetiniń Batys Qazaqstan oblysy boıynsha departamentinen.
Departament qyzmetkeri Danııal Ǵabdoshevtiń aıtýynsha, bul josparly shara penıtentsıarlyq júıe bólimderinde memlekettik tildi tereńdetip damytý maqsatynda ótti. «Til - tatýlyq tiregi» ashyq sabaǵynyń ereksheligi sol, ol sharaǵa qylmystyq-atqarý júıesinde jumys isteıtin ózge ult ókilderi - orystar, nemister, tatarlar, belarýstar, t.b. qatysty.
Qazaq tili muǵalimi Tursyn Jolamanovtyń jetekshiligimen ótken sabaqtyń barysynda termınder konkýrsy, sóılemder qurastyrý jáne maqal-mátelder baıqaýy ótti. Mundaı konkýrstar memlekettik tildi tereńdetip damytýǵa oń áserin tıgizedi, deıdi D.Ǵabdoshev.
