Oralda kúıshi Edige Nábıevtiń keshi ótti
ORAL. QazAqparat - Qadyr Myrza Álı atyndaǵy mádenıet jáne óner ortalyǵynda elge tanymal kúıshi, dombyra jasaýshy sheber, respýblıkalyq «Úkili dombyra» baıqaý-báıgesiniń eki márte júldegeri Edige Nábıevtiń kúı keshi ótti, dep habarlaıdy «QazAqparat» HAA tilshisi.
Astrahan óńirinde ómir esigin ashqan Edige Nábıev ata-babadan kele jatqan kúı dástúrin úzbeı, kúni búginge deıin jalǵap keledi. Jas kezinde sportpen aınalysyp, án de shyrqaǵan Edige keıin mádenı jáne rýhanı salaǵa birjola aýysty. Dombyrany solaqaı tartatyn kúıshiniń ereksheligi, ár kúıdiń tarıhyn aıta otyryp, oryndaıdy. Óziniń aıtýynsha, jetpis shaqty kúıdi bilgenimen, qazir sonyń elýden astamyn tartyp bere alady. Olardyń ishinde sırek tartylatyn, estilmegen kúıler de barshylyq. Edige Nábıev Bókeı handyǵy men Aq Jaıyq óńirinde ertede ǵumyr keshken ánshilerdiń týyndylaryn da jaqsy biledi. Jas shaǵynda tamaǵyn aýyrtyp alyp, ándi qoıyp ketkenimen, sol asyl muraǵa degen ińkárligi basylǵan emes. Ár ánniń shyǵý tarıhyn áńgimelep, keıingi býynǵa jetkizip otyrady. Al kúıdi dombyrany sabalamaı, bappen, syrbaz tartýdyń sheberi dese bolady. Bul joly da jınalǵan kórermender Edige tartqan kúıdi tyńdap, eki saǵattaı tapjylmaı otyrdy.
Ónerpazdyń taǵy bir qyry, dombyra jasaýdyń sheberi ekendigi. Qazirgi tańda onyń qolynan shyqqan dombyralarmen ánshi-kúıshiler shetelderge de shyǵyp júr. Osy keshte aldy halyqaralyq baıqaýlardyń laýreaty atanyp úlgergen Ádil Ahmetov, Jasulan Zınnedınov, Berik Shaımardanov, Maksım Karmyshev Edige Nábıev jasaǵan dombyramen sahnaǵa shyǵyp, kúı oryndady. Al J.Zınnedınov pen B.Shaımardanov kúı tartys jasap, kórermenderdiń delebesin qozdyrdy.
Dombyrashy, «Oral sazy» folklorlyq-etnografııalyq ansambliniń jetekshisi Asqar Kenjeǵalıev júrgizgen shara barysynda Qazaqstan Jazýshylar odaǵynyń múshesi, aqyn Aıtqalı Nárikov, Qurmanǵazy atyndaǵy mýzyka kolledjiniń dırektory, dombyrashy Nurjan Sertekov, kúıshiniń apasy Mástýra Nábıeva, óner janashyry Tólegen Safýllın jáne basqalar jyly lebizderin bildirdi. 
Zeınetkerlik jasta bolsa da, kúı ónerin talmaı nasıhattap kele jatqan E.Nábıevke oblystyq mádenıet, muraǵattar jáne qujattama basqarmasynyń basshysy Dáýletkereı Qusaıynovtyń alǵyshaty tabys etildi. 
