Oralda kúıshi, 85 jastaǵy Ótegen Jumashevtiń keshi ótti
ORAL. QazAqparat - Qadyr Myrza Álı atyndaǵy mádenıet jáne óner ortalyǵynda belgili kúıshi Ótegen Jumashevtiń «Darııa kúıdiń kemesi» atty shyǵarmashylyq keshi ótti, dep habarlaıdy «QazAqparat» HAA tilshisi.
Osy kúnderi týra 85 jasqa tolǵan Ótegen Jumashev Bókeı ordasy aýdanynda 1932 jyly dúnıege kelgen. Dombyra tartýdy bes jasynan úırengen ol kóptegen kúılerdi búginge jetkizdi. Sonyń ishinde ótken ǵasyrdyń alpysynshy-jetpisinshi jyldary Mahambettiń «Ókinish», Seıtektiń «Bes qyz», Naqyshtyń «Aıjan apaı», «Aqjeleń», Músiráliniń «Músiráli», Qurmanǵazynyń «Baıjuma», Qojaqtyń «Aqsaq ker at» jáne basqa sırek tartylatyn kúılerdi altyn qorǵa jazdyrdy. Keıin Jánibek aýdanynda turǵan Ótegen Jumashev osyndaǵy dombyra orkestri quramynda óner kórsetti.
Óz shyǵarmashylyq keshinde de Ótegen aqsaqal Qurmanǵazy, Dına, Mámen, Esjan syndy halyq kompozıtorlarynyń kúıleriniń shyǵý tarıhyn aıta otyryp, tamyljyta oryndap berdi. Tól týyndysy «Shattyq» kúıin de shalqytty.
Dombyrashylar, Qurmanǵazy atyndaǵy mýzyka kolledjiniń dırektory Nurjan Sertekov kesh ıesiniń halyqtyq murany saqtaýdaǵy eńbegine toqtalsa, oblystyq mádenıet, muraǵattar jáne qujattama basqarmasynyń basshysy Dáýletkereı Qusaıynov oblys ákiminiń birinshi orynbasary Arman Óteǵulovtyń atynan alǵys hat tabys etip, ıyǵyna shapan japty. Sol sekildi Jánibek aýdanynyń ókilderi Ó.Jumashevtiń 85 jyldyǵyna oraı qurmet kórsetti.
Batysqazaqstandyq óner sheberleri qatarynda elge tanymal dombyrashylar, Qazaqstannyń eńbek sińirgen mádenıet qyzmetkeri, «Qurmet» ordeniniń ıegeri Ermek Qazıev, Edige Nábıevterdiń sahnaǵa shyǵýy kıeli kúı dástúriniń úzilmeıtindigin taǵy bir tanytty.
