Oralda kúıik jaraqatyn alǵan áıel Samarada emdelmek
ORAL. QazAqparat - Oraldaǵy gaz jarylysynan kúıik shalǵan áıel Samarada emdelmekshi, dep habarlaıdy «QazAqparat» tilshisi.
Oblystyq densaýlyq saqtaý basqarmasy basshysynyń orynbasary Nurdanat Berkinǵalıulynyń aıtýynsha, týystary Samaradan keńesýge maman-dáriger alyp kelgen. Sodan keıin áıel Samara qalasyndaǵy N.Pırogov atyndaǵy №1 qalalyq klınıkalyq aýrýhananyń №11 kúıik jaraqaty bólimshesine jetkizildi.
Denesiniń 85 paıyzyn kúıik shalǵan eki balanyń anasy Áselim Nyǵmetova mektepte muǵalim bolyp jumys jasaıdy. Kúıeýi Rýslan Nyǵmetovtiń inisi Erlan Nyǵmetovtiń sózine qaraǵanda, jeńgesin Samarada emdeý óte qymbatqa túskeli otyr. Shamamen 5 mln teńgedeı qarajat kerek. Jaryn Samaraǵa aparyp, qasynda bolyp, túnde kelgen Rýslan qazir arnaıy esepshot ashýdyń qamymen júr. Otqa oranǵan áıelin kórip, sóndirmek bolǵan Rýslannyń da qolyn kúıik shalǵan edi. Oǵan da kómek kórsetilgen.
«Áselimniń jaǵdaıy búgin tústen keıin belgili bolady. Bárimiz sonyń tileýin tilep otyrmyz», dedi E.Nyǵmetov.
Eske sala keteıik, 18 qarasha kúni saǵat 09.58 shamasynda Oralǵa qarasty Zachagan kentindegi turǵyn úıde gaz-aýa qospasynyń jarylysy bolyp, alty adam zardap shegip, sonyń ishinde 37 jasar Á.Nyǵmetovanyń denesin 85 paıyz kúıik shalyp, keıin onyń ishtegi sábıi shetinep ketken edi.
