Oralda kúıeýiniń ıntımdik sýretin taratqan áıel 3 jylǵa sottaldy
ASTANA. KAZINFORM – Batys Qazaqstan oblysynda qyzǵanyshtan kúıeýiniń fotosýretterin taratqan áıel bas bostandyǵynan aıyryldy. Bul týraly Batys Qazaqstan oblysy Prokýratýrasynyń baspasóz qyzmeti málim etti.
Sońǵy jyldary jeke ómirge qatysty materıaldardy, fotosýretter men beınelerdi ıeleriniń kelisiminsiz taratý máselesi jeke aqparat pen adam quqyqtaryn qorǵaý salasyndaǵy eń ózekti máselelerdiń birine aınaldy.
Árbir turǵyn joldasyna nemese tanystaryna jeke ómirine qatysty fotosýretterdi jibergeni úshin bas bostandyǵynan aıyrý túrindegi jazaǵa tartylatyn jaǵdaıǵa tap bolýy múmkin.
«Sekstıng» (jynystyq sıpatta hat almasý) — qazirgi álemde óte keń taralǵan qubylys.
Biraq zııansyz jeke hat almasý arqyly da qylmystyq is boıynsha aıyptalýshy bolyp qalý qaýipi bar.
Máselen, «N» azamatshasy qyzǵanyshtan kúıeýiniń ıntımdik sýretin «WhatsApp» mobıldi messendjeri arqyly taratqan. Oral prokýratýrasynyń memlekettik aıyptaýshysynyń tabandy ustanymyn eskere otyryp, sottalýshynyń kinási tolyq dáleldendi. Oral qalalyq sotynyń úkimimen ol 3 jylǵa bas bostandyǵynan aıyryldy (Qazaqstan Respýblıkasy Qylmystyq kodeksiniń 147-baby (Jeke ómirge qolsuǵylmaýshylyqty jáne Qazaqstan Respýblıkasynyń derbes derekter jáne olardy qorǵaý týraly zańnamasyn buzý). Sol sııaqty, «I» esimdi azamat áıeliniń jeke sýretin taratqany úshin 3 jylǵa bas bostandyǵynan aıyryldy. Úkimder zańdy kúshine endi, - delingen habarlamada.
Máseleniń ózektiligin eskere otyryp, Batys Qazaqstan oblysynyń prokýratýrasy barlyq azamattar men zańdy tulǵalardy zańdy saqtaýǵa jáne basqa adamdardyń quqyqtary men qadir-qasıetin qurmetteýge shaqyrady.
Jeke ómirge qol suǵylmaýshylyq materıaldaryn kelisimsiz taratý aýyr moraldyq zııan keltirip qana qoımaı, 6 jylǵa deıin bas bostandyǵynan aıyrýǵa qylmystyq jaýapkershilikke ákelýi múmkin.
Sonymen qatar mınıstrlik tsıfrlyq qaýipsizdiktiń mańyzdylyǵyn eske saldy. Internette qandaı materıaldarmen jáne kimmen bólisetinińizge muqııat bolý kerek.
Eske salsaq, keshe Aqtóbede qyzyn zorlady dep aıyptalǵan áke 20 jylǵa sottaldy.
Budan bólek, aqtóbelik áıeldi balasymen qosa qaǵyp ketken júrgizýshi 2 jylǵa bas bostandyǵynan aıyryldy.
