Oralda kúıeýi tutqynǵa alǵan áıel bosatyldy
NUR-SULTAN. QazAqparat - Oral qalasynda tutqyndy bosatý operatsııasy sátti ótti, dep habarlaıdy QazAqparat tilshisi QR Іshki ister mınıstrliginiń baspasóz qyzmetine silteme jasap.
«Oral qalasynda tutqyndy bosatý operatsııasy ólim-jitimsiz jáne aýyr saldarsyz aıaqtaldy. Polıtsııa arnaıy jasaǵy qarý men arnaıy qural-jabdyq qoldanbastan qaskúnemdi ustady. Operatsııa saǵat 19-45-te (Nur-Sultan ýaqytymen 20-45-te) aıaqtaldy. Jubaıyn kepilge alǵan azamatpen kelissóz júrgizýshiler saǵat 13-10-nan bastap kelissóz júrgizip, ol 6 saǵattan astam ýaqytqa sozyldy. Dıalogqa onyń jaqyn týystary men dostary da aralasty. Uzaqqa sozylǵan kelissózderden keıin ol áıelin bosatty jáne sodan keıin ony arnaıy jasaq qyzmetkeri ustady», - dep atap ótedi mınıstrlikten.
Vedomstvo málimetinshe, tutqynda bolǵan áıeldiń aıaǵynda pyshaq jaraqaty bar. Zardap shegýshini medıtsına qyzmetkeri qarady jáne qazirgi ýaqytta onymen psıhologtar jumys istep jatyr.
Oqıǵa bolǵan mańdaǵy úılerdiń turǵyndary men sol mańǵa jaqyn júrgen adamdar taıaý jerdegi orta mektep ǵımaratyna ornalastyrylyp, jylytý pýnkti jasaqtalǵan.
«QR QK 261 baby boıynsha sotqa deıingi tergeý bastaldy. Qazirgi ýaqytta qorshaý alynyp jatyr. Sodan keıin turǵyndar óz úılerine orala alady», - dedi vedomstvodan.
