Oralda qutqarýshylar taǵy bir balany sýǵa ketýden aman alyp qaldy
ORAL. QazAqparat - Oralda búgin jedel qutqarý jasaǵynyń qyzmetkerleri 2005 jylǵy balany sýǵa ketýden aman alyp qaldy, dep habarlaıdy QazAqparat tilshisi.
BQO TJ departamenti jedel qutqarý jasaǵynyń bas qutqarýshysy Aıagóz Qojanbaevanyń aıtýynsha, qalalyq mádenıet jáne demalys saıabaǵyndaǵy qutqarý beketinde kezekshilikte júrgen Pavel Fedorov pen Azamat Járdemov Shaǵan ózenine batyp bara jatqan balany baıqap qaldy.
Jaǵalaýdan jyraqtap ketken balaǵa Azamat Járdemov jedel júzip baryp, ony sýdan alyp shyqty. Qutqarýshylar qatty qorqyp qalǵan balaǵa qajetti kómek kórsetti. Balasynyń alysqa uzap ketkenin kórmeı, salǵyrttyq tanytqan anasyna da sýǵa túsý kezinde qaýipsizdik saqtaý kerektigi eskertildi.
Eske sala keteıik, bul - Oraldaǵy mundaı birinshi oqıǵa emes. Budan buryn qutqarýshylardyń on jasar balany aman alyp qalǵanyn jazǵan bolatynbyz.
