Oralda qurylysy bitpeı, qańyrap turǵan nysandar az emes
ORAL. QazAqparat – Oralda qurylysy bitpeı, qańyrap turǵan nysandar az emes. Bul týraly oblys ákimi Ǵalı Esqalıevtiń tóraǵalyǵymen ótken ınvestıtsııalardy tartý, ınvestıtsııalyq ahýaldy jaqsartý jáne eksportty ilgeriletý jónindegi óńirlik keńes otyrysynda aıtyldy, dep habarlaıdy QazAqparat tilshisi.
Onda óńir basshysynyń atap ótkenindeı, qalada jyldar boıy salynbaı, bos turǵan ǵımarattar barshylyq.
Mundaı ǵımarattar ınvestıtsııalyq ahýalǵa keri áserin tıgizýmen qatar qala kórkin buzyp, turǵyndarǵa qaýip tóndiredi. Soǵan baılanysty osy nysandardyń ıelerin taýyp, kelissóz júrgizip, qozǵaý salý tapsyrylǵan bolatyn.
«Mundaı nysandardyń bolmaýyna biz de múddelimiz. Sondyqtan olardyń ıelerine ákimshilik nemese qarjylaı qoldaý kerek bolsa, qolushyn sozýǵa daıynbyz. Qurylysy bitip, nysandar iske qosylsa, kóptegen jumys oryndary ashylar edi. Bul máseleni udaıy qadaǵalap otyratyn bolamyz», dedi oblys ákimi.
BQO memlekettik sáýlet-qurylys baqylaý basqarmasynyń basshysy Baýyrjan Seıtqalıdyń aıtýynsha, óńir basshysynyń tapsyrmasyna sáıkes osy másele boıynsha ótken jyldyń qazan aıynda arnaıy vedomstvoaralyq komıssııa qurylǵan edi.
Tekserý nátıjesinde bastapqyda qalada 14 nysannyń qurylysy toqtap turǵany belgili boldy. 13 nysannyń ıesi anyqtalyp, tıisti jumystar júrgizilýde. Al «Omega» zaýyty aýdanyndaǵy bir nysannyń ıesi izdestirilýde.
Mysaly, N.Nazarbaev dańǵyly 177 A meken-jaıynda oryn tepken «Ideal Market» JShS menshigindegi nysan qańyrap bos tur. Eskertýden keıin tıisti shara alynbaǵandyqtan, sotqa da júginýge týra keldi. Qazirgi kezde kelissóz nátıjesinde ǵımarat ornalasqan jerdiń paıdalaný baǵyty ózgertilip, aınalasyn tazartý, terezelerin ýaqytsha biteý jumystary jasalýda.
«Basqa da nysandar ıelerimen osyndaı yqpal etý sharalary júrgiziletin bolady», dedi B.Seıtqalı.
Taǵy bir másele, monıtorıng júrgizý barysynda 23 nysanda qurylys jumystarynyń bastalǵany jóninde habarlama jiberilmeı, zańbuzýshylyqtyń oryn alǵandyǵy anyqtaldy. Olardyń arasynda kóp qabatty úı turǵyzyp jatqan kásipkerler de bar. Sonyń biri – Samar kóshesi boıyndaǵy bes qabatty turǵyn úıdiń qurylysy (menshik ıesi – úsh adam) ótken jyldyń qazan aıynda bastalǵan. Qurylys jobalaý-smetalyq qujattamasyz júrgizilgen, tehnıkalyq jáne avtorlyq qadaǵalaý bolmaǵan. Menshik ıeleri ákimshilik jaýapkershilikke tartylyp, 777 myń teńge kóleminde aıyppul salyndy. Qazirgi ýaqytta kemshilikter joıylǵanǵa deıin qurylysty toqtatý jóninde uıǵarym berildi. Sondaı-aq Qadyr Myrza Álı shaǵynaýdany 29-mekenjaıynda salynyp jatqan toǵyz qabatty jáne L.Tolstoı kóshesi 143-tegi turǵyn úı qurylysy ıeleriniń árqaısysyna 222 myń teńgeden aıyppul salyndy.
Ǵalı Esqalıev basqa da nysandar boıynsha osyndaı jumystar júrgizip, naqty sharalar alýdy tapsyrdy.
Keńeste sonymen qatar Zachagandaǵy «Aqjaıyq» shaǵynaýdanynyń qurylysy, Derkól kentinde shaǵyn ındýstrıaldyq aımaq qurý jáne Báıterek aýdany ıAnvartsev aýylynda kókónis qoımasyn salýǵa qatysty ınvestıtsııalyq jobalar talqylandy.
