Oralda Qurmanǵalıev atyndaǵy oblystyq fılarmonııanyń 50 jyldyǵy merekelendi
ORAL. QazAqparat - Batys Qazaqstan oblystyq qazaq drama teatrynda Ǵ.Qurmanǵalıev atyndaǵy oblystyq fılarmonııanyń 50 jyldyǵyna arnalǵan merekelik shara ótkizildi, dep habarlaıdy «QazAqparat» HAA tilshisi.
Aldymen teatr foıesinde fılarmonııanyń ótkeni men búgini týraly derekti fılm kórsetildi.
Fılarmonııa ujymyn BQO ákimi Altaı Kólginovtiń atynan oblystyq mádenıet, muraǵattar jáne qujattama basqarmasynyń basshysy Dáýletkereı Qusaıynov quttyqtap, izgi tilegin bildirdi. Onyń atap ótkenindeı, óner salasynyń qyzmetkerleri ultqa, elge, jalpy adamzatqa qyzmet etedi. Elbasynyń bıylǵy Joldaýynda aıtylǵanyndaı, adamı kapıtal sapasyn jaqsartýǵa mádenıet te kiredi. Eldiń mártebesi ósip, bedeliniń bıikteýine mádenıet qyzmetkerleri óz úlesterin qosyp keledi. Salaǵa memleket tarapynan qoldaý árkez kórsetile bermek. Eń bastysy, ata-babadan jalǵasyp kele jatqan uly óner dástúri úzilmeı, baıı túsýi tıis.
Shara barysynda fılarmonııa ardagerleri men úzdik qyzmetkerlerine oblys ákimi men QR Mádenıet jáne sport mınıstrliginiń alǵyshattary, basqa da marapattar tabys etildi.
Sodan keıin fılarmonııa ártisteri Aq Jaıyq jurtshylyǵyna kontserttik baǵdarlamasyn usyndy. Onda Dáýletkereı atyndaǵy qazaq halyq aspaptar orkestri, «Oral sazy» folklorlyq ansambli, «Nazerke» halyqtyq bı ansamblderimen qatar Qazaqstannyń eńbek sińirgen ártisteri Qanatqalı Qojaqov, Jumaǵanym Rahımova, Qazaqstannyń eńbek sińirgen qaıratkeri Murat Ámirhanov syndy ánshiler, Qazaqstannyń eńbek sińirgen mádenıet qyzmetkeri, dombyrashy Ermek Qazıevten bastap jastarǵa deıin óz ónerlerin kórsetti. Tosynsyı da bolmaı qalǵan joq. Mysaly, estrada ánshileri, halyqaralyq jáne respýblıkalyq baıqaýlardyń laýreattary Jańylsyn Hasanova men Marat Sarbópeev Dáýletkereı atyndaǵy orkestrdiń súıemeldeýimen sahnaǵa shyqty. Al dástúrli ánshiler, Qazaqstannyń eńbek sińirgen qaıratkeri Qatımolla Berdiǵalıev pen Qazaqstannyń eńbek sińirgen ártisi Sáýle Taýdaeva estradalyq ansambldiń súıemeldeýimen án oryndady. Barıtondar (Aıbar Haıyrhanov, Kamalıden Aıtbaev, Altynbek Orazov), sopranolar (Aqsulý Jumalıeva, Elmıra Ýsaeva, Aıdana Ájiǵalıeva), dástúrli ánder (Saǵadat Rahmetjanov, Kúlásh Qýanyshqalıeva, Aqmaral Kemelhanova), aspapta oryndaýshylar sherýleri de jarasymdy boldy.
Aıta keteıik, Ǵarıfolla Qurmanǵalıev atyndaǵy Batys Qazaqstan oblystyq fılarmonııasy halqymyzdyń mýzyka ónerin keńinen damytý jáne nasıhattaý maqsatynda Qazaq KSR Mınıstrler Keńesiniń 1966 jylǵy 25 qańtardaǵy №66 qaýlysymen quryldy. Fılarmonııanyń alǵashqy dırektory bolyp Almaty memlekettik konservatorııasynyń túlegi, joǵary kásibı bilimdi maman Ýálı Kárimov taǵaıyndaldy. Ánshi, kúıshi, bıshi mamandar konkýrs boıynsha qabyldanyp, Bekbolat Mashqanov, Nurǵalı Bojymov, Maqsat Muhıtdenov, Gúljamal Mamasheva, kórkemsóz oqý sheberi Gúljııan Atosheva, termeshi Gúlbarshyn Sahıpova syndy talantty jastardan alǵashqy estradalyq ansambl quryldy. Onyń kórkemdik jetekshisi bolyp oraldyq mýzykant Nıkolaı Gorelov bekitildi. B.Mashqanovqa elimizde alǵashqylardyń qatarynda Qazaqstannyń eńbek sińirgen ártisi ataǵy berildi.
Fılarmonııaǵa ár jyldary Ý.Kárimovke qosa Uly Otan soǵysy ardageri Saǵyn Esenálıev, keıin Qurmanǵazy atyndaǵy Oral mýzyka ýchılışesiniń dırektory bolǵan pedagog-ustaz Mahambet Erjanov, Qazaqstannyń eńbek sińirgen qaıratkerleri, rejısser Maqsot Omarǵalıev, ánshi-kompozıtor Donedil Qajymov, sondaı-aq QR mádenıet qaıratkeri Marat Qalıev basshylyq etti. Qazirgi dırektory - Qadyrbolat Musaǵalıev.
Ótken ǵasyrdyń jetpisinshi jyldary fılarmonııa Qurmanǵazy atyndaǵy mýzyka ýchılışesin bitirip, kásibı ónerge qanat qaqqan Tilek Luqpanov, Oleg Glınskıı, Ámir Tóleýov, Narıman Dúısenov, termeshi Qoısyn Dúısenova, pantomıma janrynyń sheberi Zıfıl Sıtdıkov, bıshi Raıhan Kójekesheva, ánshi Qanatqalı Qojaqovpen tolyqsa, seksen besinshi jyldary Almaty estrada stýdııasynyń Ǵ.Qurmanǵalıev klasyn bitirgen termeshi-ánshiler Mahambet Balpeıisov, Sáýle Taýdaeva, Saǵadat Rahmetjanov, Qurmanǵazy atyndaǵy memlekettik konservatorııa túlegi Murat Ámirhanov syndy úshinshi lek keldi.
Odan keıin de kásibı óner ordasy jańaryp, jas talanttarmen udaıy tolyǵýda. Fılarmonııada túrli janrdaǵy mamandyqty jete meńgergen, joǵary bilikti mamandardan turatyn birneshe shyǵarmashylyq ujym bar. Atap aıtqanda, Dáýletkereı atyndaǵy qazaq halyq aspaptar orkestri, «Oral sazy» folklorlyq-etnografııalyq ansambli, «Nazerke» halyqtyq bı ansambli, «Klassıka» kameralyq ansambli, «Orda» aspaptyq trıosy, «Án qanatynda» estradalyq ansambli, dástúrli jáne estradalyq ánshiler, kúıshiler, atalǵan ujymdardyń kórkemdik jetekshileri, dırıjerlary, baletmeısteri, rejısser, dybys rejısseri men operatory, sýretshi, shyǵarmashylyq ujymnyń jumysyn uıymdastyratyn ákimşilik qyzmetkerler men kishi tehnıkalyq qyzmetkerlerdi qosqanda, barlyǵy 160-tan astam adam eńbek etedi.
