Oralda qurbandyq mal shalynatyn oryndar baqylaýda bolmaq

ORAL. KAZINFORM – Oral qalasynda qurbandyq mal shalynatyn úsh oryn belgilendi. Bul týraly qala ákimdiginde Qurban aıt merekesin uıymdastyrý jáne ótkizý jóninde ótkizilgen jıynda aıtyldy.

Oblys ortalyǵynda «Kýbleı» JShS, «BQO turaqtandyrý qory» JShS («El yrysy») jáne «Batys adal et» JShS-da mal qurbandyqqa shalynatyn bolady. Sondaı-aq Qazaqstan musylmandary dinı basqarmasy qurban shalý rásimin qashyqtan ótkizýge arnalǵan qurban2024.kz saıtyn iske qosty.

Jıyn barysynda qala ákiminiń orynbasary Arsen Ǵubashev merekeni uıymdastyrý jáne ótkizýge qatysty birqatar tapsyrma berdi. Quzyrly mekemelerge qurbanǵa shalynatyn maldardyń veterınarlyq tekseristen ótýin, qujattarynyń durys bolýyn qadaǵalaý, qurbandyq shalynatyn oryndarda sanıtarlyq talaptardyń oryndalýyn qadaǵalaý júkteldi. Sonymen qatar belgilengen oryndardyń abattandyrylýy, qoǵamdyq qaýipsizdiktiń saqtalýy qatań baqylaýda bolýy qajet.