Oralda quny 65 mln teńgeden asatyn sırenalyq-sóıleý qurylǵylary ornatylyp jatyr
ORAL. KAZINFORM – Oral qalasynda zamanaýı dabyl júıesi ornatyla bastady.
Oral qalasy ákimdiginen málim etkenindeı, mundaǵy maqsat – turǵyndardy tabıǵı, tehnogendik jáne áleýmettik sıpattaǵy tótenshe jaǵdaılar týraly der kezinde habardar etý.
Atalmysh qurylǵylar qaýip tóngen jaǵdaıda jedel habar taratýǵa, qoǵamdyq mańyzy bar jáne jedel aqparatty jetkizýge, turǵyndardyń qaýipsizdigin qamtamasyz etýge múmkindik beredi.
– Júıeni engizý arqyly tótenshe jaǵdaılarǵa daıyndyq deńgeıi artady, jaýapty qyzmetterdiń áreket etý ýaqyty qysqarady, yqtımal táýekelder men shyǵyndar azaıady. Qurylǵylardyń jalpy quny 65 mln. teńgeden asady. Joba «Azamattyq qorǵaý týraly» QR Zańyna sáıkes jergilikti bıýdjet esebinen júzege asyrylyp jatyr, - dep habarlady vedomstvodan.
Eske sala keteıik, budan buryn Oralda qubyr aýystyrýǵa baılanysty 200-den astam abonent ystyq sýsyz qalǵanyn jazǵan edik.