Oralda quny 5,3 mlrd astam teńgege baǵalanǵan eki konkýrstyń kúshi joıyldy

ORAL. KAZINFORM — Bıylǵy 15 qańtarda Oral qalasynyń ákimdigi jalpy somasy 5,357 mlrd teńgege shahardyń kóshe-jol jelisin ustaýǵa jáne sanıtarlyq tazalaýǵa 2 ashyq konkýrs jarııalady.

BQO prokýratýrasynyń baspasóz qyzmetinen málim etkenindeı, konkýrstyq qujattamada áleýetti ónim berýshilerdiń jumys tájirıbesi týraly negizsiz talap qoıylyp, memlekettik satyp alý zańnamasynyń buzylýyna jáne básekelestikti shekteýge jol berilgen.

Oblys prokýratýrasynyń narazylyǵy boıynsha konkýrstardyń kúshi joıyldy.

— 2024 jyly da qalany kútip ustaý boıynsha osyndaı jumystar taldanǵan bolatyn. Monopolııalyq jaǵdaı jasalynyp, bir ónim berýshiniń 6 mlrd teńgeden astam qarajatty ıgergeni anyqtaldy. Prokýratýranyń talaby boıynsha QR Básekelestikti qorǵaý jáne damytý agenttiginiń BQO boıynsha departamentimen júrgizilgen tergep-tekserý barysynda Oral qalasy turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimi tarapynan básekelestikke qarsy is-qımyl faktileri rastaldy. Tekseris qorytyndysyna sáıkes zańnama buzýshylyqtaryn joıý týraly uıǵarym engizilip, atalmysh bólim basshysyna 150 AEK mólsherinde ákimshilik aıyppul salynǵan edi, — dep habarlady vedomstvodan.

Eske sala keteıik, budan buryn Oralda tender ótkizý kezinde básekelestikke qarsy áreketke jol berilgenin jazǵan edik.