Oralda quny 21,6 mlrd teńge bolatyn sý ınfraqurylymy jobalary iske asyp jatyr

Aımaqqa issaparmen barǵan Premer-mınıstrdiń keńesshisi Ermek Marjyqpaev jańǵyrtý jumystaryn tekserdi.

Jerasty sýlary ken ornynyń sýjınaǵysh qurylystaryn qaıta qurý jobasyna sáıkes, táýligine 35 myń tekshe metr sý alýǵa múmkindik týady. Nysan iske qosylǵanda 360 myń abonentti qamtýǵa qaýqarly, ıaǵnı oraldyqtar tirshilik nárinen tapshylyq kórmeıdi degen sóz. Qala halqy úshin mańyzdy joba qarjylyq jaǵdaıǵa baılanysty kesteden keshigýi múmkin. Ermek Marjyqpaev máseleni ýákiletti organdarǵa jetkizýge, nazarda ustaýǵa ýáde berdi.

Úkimet basshysynyń keńesshisi kommýnaldyq ınfraqurylymdardy jańartý jumystaryna da zer saldy. Óńirde sý, káriz jáne jylý júıesi kezeń-kezeńimen jańartylyp keledi. Keıingi 3 jylda 10,5 mlrd teńgege 4 iri káriz-sorǵy stansasy tolyq jańǵyrtylyp, 320 myń turǵyn senimdi káriz júıesimen qamtyldy. 

Ermek Marjyqpaevqa qaladaǵy № 1, № 18A, № 29 káriz sorǵy stansalarynyń ǵımarattaryn qaıta qurý jobalarynyń barysy tanystyryldy. Úsh joba da jylý maýsymyna deıin tolyq aıaqtalmaq. 

Óńirde elektrmen jabdyqtaý salasynda 3 jylda jalpy quny 13 mlrd teńge bolatyn 12 joba júzege asyrylyp, 6 myń shaqyrymǵa jýyq tozǵan elektr jelileri jańartyldy. 2 jańa qosalqy stansa men óndiristik jóndeý bazasy salyndy. Búginde 138 shaqyrym elektr jelileri jańǵyrtylyp jatyr. Onyń aıasynda «Zachagan-Peremetnyı», «Peremetnyı-Tasqala» jáne «Chapaev-Qabyrshaqty» baǵyttarynda 110 kV áýe jelisi tartylyp, eldi mekender sapaly qyzmetpen qamtamasyz etiledi. Qazir 2 kezeń aıaqtalyp, úshinshi ýchaskede jumystar júrip jatyr.

800 tirektiń 550-i, sondaı-aq oqshaýlaǵyshtar ornatylǵan. Júrgizilgen júıeli jumystar nátıjesinde óńirde elektr jelileriniń tozý deńgeıi 82 paıyzdan 75,4 paıyzǵa tómendedi.

Ermek Marjyqpaev atqarylyp jatqan keshendi is-sharalar óńirdiń energetıkalyq qaýipsizdigin nyǵaıtyp, kommýnaldyq sektordyń senimdiligin jańa deńgeıge kóteretinin aıtyp, mańyzdy jobalar Úkimet baqylaýynda bolytynyn jetkizdi.