Oralda quny 100 mln teńgege jýyq zańsyz temeki aınalymynyń joly kesildi
ORAL. KAZINFORM — Batys Qazaqstan oblysy boıynsha ekonomıkalyq tergep-tekserý departamenti júrgizgen tergeý nátıjesinde 102 myńnan astam qorapsha zańsyz temeki ónimi tárkilendi.
Departamenttiń baspasóz qyzmetinen málim etkenindeı, Oral qalasynyń turǵyny temeki ónimderin zańsyz jetkizý jáne ótkizý shemasyn uıymdastyrǵany anyqtaldy.
Aktsızdik markalary jáne mindetti tsıfrlyq tańbalaýy joq temeki ónimderi elimizdiń basqa oblystarynan óńirge jetkizilip, keıin ár túrli mekenjaılarda jasyrylyp, satýǵa daıyndalǵan.
Taýardyń iri partııalaryn saqtaý úshin Oral qalasyndaǵy jáne Báıterek aýdanyndaǵy turǵyn úıler, onyń ishinde týystary men tanystaryna tıesili úı-jaılar paıdalanylǵan.
Jedel tergeý is-sharalarynyń nátıjesinde zańsyz aınalymnan jalpy quny 99,4 mln teńge bolatyn 102 418 qorapsha temeki ónimi tárkilendi.
Bıýdjetke 37 mln teńge mólsherinde aktsız tólemderi túspegen.
Osylaısha, temeki ónimderiniń zańsyz aınalymy tańbalaýy joq taýardy ótkizý arqyly tabys tabýǵa jáne sonymen qatar bıýdjetke mindetti tólemderdi tóleýden jaltarýǵa múmkindik bergen.
- Tergeý nátıjesinde Oral qalasy turǵynynyń áreketi QR Qylmystyq kodeksi 214-babynyń 1-bóligi boıynsha saralandy. Sot Oral qalasynyń turǵynyn kináli dep tanydy. Іs júrgizý jańa Konstıtýtsııanyń qabyldanýyna oraı jarııalanǵan raqymshylyq aktisiniń qoldanylýyna baılanysty toqtatyldy. Tárkilengen temeki ónimderi joıylýǵa jatady, - dep habarlady vedomstvodan.
Eske sala keteıik, budan buryn dropperlik arqyly tabys tapqan Oral turǵynyna sot úkimi shyqqanyn jazǵan edik.
