Oralda «Kúmbirlegen kúmis kúı» respýblıkalyq dombyrashylar baıqaýy márege jetti
Oblystyq halyq shyǵarmashylyǵy ortalyǵy uıymdastyrǵan kúı saıysyna Almaty qalasy, Mańǵystaý (Jańaózen), Atyraý, Qyzylorda jáne Batys Qazaqstan oblystarynan barlyǵy 14 úmitker qatysty.
Dombyrashylar eki kúnge sozylǵan, úsh kezeńnen turatyn baıqaý barysynda Dáýletkereı, Naýsha jáne Qurmanǵazynyń kúılerin oryndady. Sońǵy kezeńde olardy Ǵ.Qurmanǵalıev atyndaǵy Batys Qazaqstan oblystyq fılarmonııasy Dáýletkereı atyndaǵy ult aspaptar orkestri (bas dırıjery ári kórkemdik jetekshisi Erkin Nurymbetov) súıemeldedi.
Respýblıkaǵa tanymal dombyrashy, Qazaqstannyń eńbek sińirgen mádenıet qyzmetkeri Ermek Qazıev bastaǵan qazylar alqasynyń sheshimimen bas júlde (500 myń teńge) atyraýlyq Jánibek Jámıevke buıyrdy.
Almatylyq Nazerke Bazarbaeva birinshi (300 myń teńge), atyraýlyq Qaırat Jumaǵalıev pen taǵy bir almatylyq Aqylbek Bektasov ekinshi (150 myń teńge), almatylyq Azamat Shynarov pen oraldyq Nargıza Kasýmova úshinshi (75 myń teńge) orynǵa ıe boldy.
Qazaq mýzykasynyń altyn qoryna Mahambet, Qurmanǵazy, Naqysh, Músiráli, Soqyr Esjan, Qojaqtyń kúılerin bergen sheber oryndaýshy, Mahambet atyndaǵy syılyqtyń jáne «Halyq kúıshisi» ataǵynyń ıegeri Ótegen Jumashevtiń osy kúnderi 90 jasqa tolýyna oraı arnaıy syılyq (100 myń teńge) belgilendi. Ol qyzylordalyq Baýyrjan Seıdáliniń enshisinde ketti. Al oraldyqtar Álibek Qýanyshálıev pen Ádilbek Qodarov dıplomant atandy (25 myń teńge).
«Tóre mektebiniń negizin qalaǵan, lırıkalyq syrly sazdarymen eliniń júregin terbegen Dáýletkereıdiń kúıshilik murasy han tuqymynan bolǵandyqtan, keńes dáýirinde qýǵyndalsa da, halyq jadynan joǵalǵan joq. Onyń kúılerin ótken ǵasyrda Naýsha Bókeıhanov jetkizse, akademık Ahmet Jubanov amanattaǵan dástúrdi biz jalǵastyryp kelemiz. Dáýletkereıdiń 200 jyldyǵy keń kólemde atalyp ótilýi tıis edi. Іndetke baılanysty kórermendersiz boldy. Baıqaýda Dáýletkereıdiń kópten oryndalmaı kelgen kúıleri tartylyp jatyr. Bul – qýanysh, jaqsylyq, osyndaı izdenisterimizdi jalǵastyra berýimiz kerek», dedi Almatydan arnaıy kelgen Qazaqstannyń eńbek sińirgen qaıratkeri, Mahambet atyndaǵy syılyqtyń ıegeri, professor, Dáýletkereı kúılerin notaǵa túsirip, zerttegen Kárıma Saharbaeva.
Eske sala keteıik, budan buryn Oralda Dáýletkereı men Naýsha kúıshige arnalǵan respýblıkalyq baıqaý ótetinin jazǵan bolatynbyz.
