Oralda kúdiktiler bes jyl boıy turǵyndarǵa zańsyz shaǵyn nesıe bergen

ORAL. KAZINFORM – Oral qalasynda turǵyndarǵa tıisti lıtsenzııasyz shaǵyn nesıe berý boıynsha zańsyz kásipkerlik qyzmetti uıymdastyrǵan adamdar tobynyń áreketi áshkerelendi.

BQO boıynsha ekonomıkalyq tergep-tekserý departamenti tergeý basqarmasy basshysynyń orynbasary Madııar Palmanovtyń málim etkenindeı, kúdiktiler bes jyl boıy «Tez aqsha» brendimen fılıal júıeleri arqyly azamattarmen 1,5 mlrd astam teńge zaım berýge kelisim-shart jasaǵan.

Onyń sózine qaraǵanda, zaımdar boıynsha paıyzdarǵa kúdiktilerdiń biriniń týysqanyna tirkelgen JShS-men konsýltatsııalyq qyzmet kórsetý týraly bólek kelisim jasalǵan.

- Zaım alýshylar konsýltatsııalyq qyzmet degen jeleýmen kúnine 1,5 paıyz tólep otyrǵan. Bul 0,3 paıyz túrindegi shekti mólsherlemeden 5 ese asyp túsedi. 1,5 mlrd astam teńgege barlyǵy 47 myń kelisim-shart jasalǵan. Qylmystyq is sotqa joldandy, - dedi M.Palmanov.

Onyń aıtýynsha, qarjylyq alaıaqtyqqa qarsy turý úshin turǵyndardyń odan jan-jaqty habardar bolýy mańyzdy. Zańsyz shaǵyn nesıe uıymdary azamattardyń qarjylyq qaýipsizdigine jáne ekonomıkalyq turaqtylyqqa qaýip tóndiredi.

Eske sala keteıik, budan buryn BQO-da ekonomıkalyq qylmystar boıynsha keltirilgen zalal kólemi 1,6 mlrd teńgeden asqanyn jazǵan edik.