Oralda qubyrdaǵy apat saldarynan 400 abonent sýsyz qaldy

ORAL. KAZINFORM – Oral qalasynyń ortalyǵynda Á.Kekilbaev pen S.Esqalıev kósheleriniń qıylysyndaǵy sý qubyrynda apattyq jaǵdaı boldy.

«Batys sý arnasy» JShS-dan málim etkenindeı, 16 aqpan kúni «Qazaqtelekom» AQ-nyń merdiger uıymy jer qazý jumystaryn júrgizý kezinde dıametri 225 mm sý qubyryn zaqymdaǵan.

Jaqyn mańdaǵy jeke turǵyn úılerdi sý basýdyń aldyn alý jáne qubyrdaǵy apatty joıý jumystaryn júrgizý úshin osy mańdaǵy mekenjaılarǵa sý berý ýaqytsha toqtatyldy. Atap aıtqanda, Isataı-Mahambet kóshesi 82, 84, A.Taımanov kóshesi 109, J.Dosmuhamedov kóshesi 8, Á.Kekilbaev kóshesi 139, D.Nurpeıisova kóshesi 10, 8 naýryz kóshesi 109-mekenjaıyndaǵy kópqabatty úıler, sondaı-aq S.Esqalıev, Á.Kekilbaev, J.Dosmuhamedov kóshesi boıyndaǵy jeke turǵyn úıler sýsyz qaldy.

Qazirgi kezde apatty qalpyna keltirý jumystary júrgizilip jatyr.

«Batys sý arnasy» JShS dırektory Ánýar Árkenovtiń naqtylaýynsha, barlyǵy 400 abonent sýsyz otyr.

Osyǵan oraı turǵyndar alańdaýshylyq bildirip jatyr. Olardyń biri úıinde sýǵa qosa jylý joqtyǵyn aıtsa, ekinshisi mundaı jaǵdaıdyń budan buryn da bolǵandyǵyn jetkizdi.

- Endi sýdy qashan beredi? Kolonkalar jumys istemeıdi. Bul ne masqara? Birese «Qazaqtelekom» kináli, birese «Oblgaz» («QazTransGazAımaq» AQ Batys Qazaqstan óndiristik fılıaly). Halyq qaıda barady? – dep jazdy Lýnara Súıinǵalıeva.

Eske sala keteıik, budan buryn Oralda qubyrdyń isten shyǵýyna baılanysty Zachagan kenti sýsyz qalǵanyn jazǵan edik.