Oralda qos qabatty ákimshilik ǵımaraty órtendi
ORAL. QazAqparat - Oraldaǵy Syrym Datuly kóshesi 23/3 mekenjaıynda qos qabatty ákimshilik ǵımaraty órtendi, dep habarlaıdy QazAqparat tilshisi.
BQO TJ departamenti órt sóndirý jáne avarııalyq-qutqarý jumystary qyzmetiniń baspasóz hatshysy Araılym Ǵanıdyń aıtýynsha, orman saýdasy bazasy aýmaǵyndaǵy órt týraly habar keshe túngi saǵat 23.10-da túsken.
Oqıǵa ornyna 20 tehnıka men jeke quramnan 59 adam shuǵyl jiberildi.
Órt aýmaǵy 300 sharshy metr aýmaqty qamtyp, ákimshilik ǵımaratyna japsarlas qoımalar men jıylǵan aǵashtarǵa taralý qaýpi tóngen. Sondyqtan barlyq kúsh jumyldyryldy. Orman saýdasy bazasynyń ıesi - «Imanǵalıeva» JK.
«Tilsiz jaý» saǵat 00.30-da oqshaýlanyp, 01.40-ta aýyzdyqtaldy.
Zardap shekkender joq.
Órttiń shyǵý sebebi, keltirilgen shyǵyn men kináli adamdar anyqtalý ústinde.
