Oralda qos birdeı jol-kólik oqıǵasynan eki adam zardap shekti
ORAL. QazAqparat - Oralda qos birdeı jol-kólik oqıǵasynan eki adam zardap shekti, dep habarlaıdy QazAqparat tilshisi.
Oblystyq densaýlyq saqtaý basqarmasynyń baspasóz qyzmetinen túsken málimetke qaraǵanda, birinshi oqıǵa búgin tańmen Zachagan kentindegi Jáńgir han kóshesi boıynda medkolledj aıaldamasy tusynda oryn aldy.
Jeńil avtokólik er adamdy qaǵyp ketti.
Jedel járdem saǵat 07.31-de shaqyrtylyp, alty mınýttan keıin brıgada jetken. Bel omyrtqasy isip ketken 1965 jylǵy er adam oblystyq aýrýhanaǵa jetkizildi.
Taǵy bir oqıǵa Eýrazııa dańǵyly boıynda «Álem Plaza» saýda úıi mańynda boldy.
Bul joly stansaǵa qaıtyp kele jatqan jedel járdem kóligi basqa bir kólikke soqtyqpaý úshin kilt burylyp, aryqqa túsip ketti.
Jedel járdem saǵat 08.31-de shaqyrylyp, bes mınýttan keıin jetti. Júrgizýshi jaraqat almaǵanymen, 1997 jylǵy feldsher qyz zardap shekti. San eti kógergen ol aýrýhanaǵa barýdan bas tartty.
Qazirgi kezde qos oqıǵanyń da jaı-japsary anyqtalý ústinde.
