Oralda qos azamattyqpen júrgen 20 adam jaýapqa tartyldy
ORAL. QazAqparat - Oralda jyl basynan beri tulǵasyn kýálandyratyn eki qujatpen júrýge qatysty 597 derek anyqtaldy, dep habarlaıdy QazAqparat «Moı gorod» portalyna silteme jasap.
Oral ishki ister basqarmasy kóshi-qon qyzmeti bóliminiń bastyǵy Qanat Muqanovtyń aıtýynsha, eki eldiń azamattyǵy bar 20 adam jaýapqa tartylǵan. «Sonyń ishinde shetel azamattyǵyn alǵan soń burynǵy tólqujatyn der kezinde tapsyrmaǵany úshin 12 adam ákimshilik jaýapqa tartyldy», - deıdi ol.
Sottyń sheshimimen toǵyz azamatqa eki júz AEK mólsherinde aıyppul salyndy, úsheýi Qazaqstan aýmaǵynan shyǵaryldy.
«Ústimizdegi jyldyń sáýir aıynda qos azamattyqpen júrgen RF azamatshasy ustaldy. Ol Reseıden de, Qazaqstannan da zeınetaqy alyp kelgen. Osy derek boıynsha qylmystyq is qozǵalyp, áıel shartty túrde bes jylǵa bas bostandyǵynan aıyryldy. Budan bólek, ol memleketke keltirilgen zalaldy tolyǵymen ótedi», - deıdi Q. Muqanov.
