Oralda qos avtobýs túıisip, eki adam jaraqat aldy
ORAL. QazAqparat - Oralda búgin qos avtobýs túıisip, eki adam jaraqat aldy, dep habarlaıdy QazAqparat tilshisi.
Oqıǵa tús qaıta Derkól kentinde Belaıa Kazarma aıaldamasy mańynda oryn alyp, №7 jáne №4 baǵytta júretin avtobýstar soqtyǵysqan.
Sonyń saldarynan №7 avtobýs joldan túsip ketken. Abyroı bolǵanda, avtobýs aǵashtarǵa tirelip, toqtap qalǵan.
Oblystyq densaýlyq saqtaý basqarmasynyń baspasóz hatshysy Aınagúl Saqposynovanyń aıtýynsha, jedel járdem saǵat 15.34-te shaqyrtylǵan. Brıgada 6 mınýttan keıin jetken.
«Jol oqıǵasy saldarynan 1989 jylǵy áıel adam jáne 2005 jylǵy qyz bala jaraqat aldy. Aldyn ala málimet boıynsha ekeýiniń de mıy shaıqalǵan. Olar oblystyq aýrýhanaǵa jetkizildi», dedi QazAqparat tilshisine A.Saqposynova.
Qazirgi kezde oqıǵanyń jaı-japsary anyqtalý ústinde.
Óńirde sońǵy kúnderi qar jaýyp, joldyń taıǵaq bolýy mundaı oqıǵalardyń jıileýine áser etýde. Mysaly, keshe Oral-Atyraý joly boıynda, Zelenov aýdany Úlken Shaǵan aýyly mańynda jeńil kólik júk kóligimen soqtyǵysyp, eki adam jaraqat aldy.
«VAZ-2115» avtokóligi júk kóligimen betpe-bet soqtyǵysqan. Jeńil avtokólik qatty zaqymdanǵan.
Sanavıatsııaǵa saǵat 13.05-te qońyraý shalynǵan. Úlken Shaǵannan jedel járdem barǵan. Aldyn ala málimet boıynsha 1989 jylǵy er adamnyń oń qolynyń bilegi synǵan. 1995 jylǵy er adam keýde tusynan jaraqat alǵan. Ekeýi de oblystyq aýrýhanaǵa jetkizildi.
Eske sala keteıik, budan buryn dál osy Oral-Atyraý jolynda bolǵan apat saldarynan úsh adam jaraqat alǵanyn jazǵan bolatynbyz.
