Oralda koronavırýstan úsh túrkistandyq turǵyn emdelip shyqty
ORAL. QazAqparat – Batys Qazaqstan oblysynda búgin koronavırýs ınfektsııasynan bes adam emdelip shyqty, dep habarlaıdy QazAqparat tilshisi.
Oblystyq juqpaly aýrýlar aýrýhanasynyń dırektory Nadııa Ahmetovanyń aıtýynsha, sonyń úsheýi – Túrkistan oblysynan. Bireýi – Oral qalasynan, taǵy bireýi – Terekti aýdanynan.
Baqylaý synamalary atalǵan bes adamnyń koronavırýstan jazylyp shyqqandyǵyn kórsetti. Endi olar 14 kún boıy úı karantıninde bolady.
«Túrkistandyq turǵyndar úılerine taksımen jetetin bolady. Aýrýhanada jatqan basqa emdelýshilerdiń ishinde bireýiniń jaǵdaıy aýyr. Qalǵandary jeńil jáne ortasha halde», dedi QazAqparat tilshisine N.Ahmetova.
Osylaısha Batys Qazaqstanda 252 adam koronavırýs juqtyrsa, sonyń 101-i saýyǵyp shyqty.
Eske sala keteıik, budan buryn BQO-da koronavırýs juqtyrǵan bes naýqastyń Reseıden kelgenin, Teńiz ken ornynan kelgen myńnan astam adamnyń úıden baqylanyp jatqanyn jazǵan bolatynbyz.
