Oralda koronavırýstan kóz jumǵan er adam Teńiz ken ornynda jumys istegen
ORAL. QazAqparat – Oralda koronavırýstan qaıtys bolǵan er adam Teńiz ken ornynda vahtalyq ádispen jumys istegen, dep habarlaıdy QazAqparat tilshisi.
BQO densaýlyq saqtaý basqarmasy málim etkenindeı, 1967 jylǵy er adam – Oral qalasynyń turǵyny.
Ol 3 mamyr kúni Oralǵa avtobýspen kelgen. Blokpostan karantındik statsıonarǵa jatqyzylyp, Covid-19-ǵa alynǵan synama teris nátıje kórsetken.
Epıdemıologııalyq ahýaldy eskere otyryp, qarym-qatynasta bolǵan adam retinde provızorlyq statsıonarǵa aýystyrylǵan. 9 mamyr kúni alynǵan synama da teris nátıje kórsetkennen keıin úı karantınine jiberilgen. 10 mamyrdan bastap medıtsına qyzmetkerleriniń baqylaýynda bolǵan. 10 mamyrdan bastap tamaǵy jybyrlap, álsizdik paıda bolyp, tábeti tómendegen. Alaıda sodan keıingi toǵyz kún boıy kómekke júginbegen, medıtsına qyzmetkerleri kún saıyn qońyraý shalǵan kezde densaýlyǵyna shaǵymdanbaǵan.
19 mamyr kúni densaýlyǵy nasharlap, júrgende demi jetpeı, hali álsiregen, tóseginen tura almaǵan. Jedel járdem brıgadasymen provızorlyq statsıonarǵa jetkizilip, synama alynǵan ýaqytta koronavırýs tabyldy.
Oblystyq juqpaly aýrýlar aýrýhanasynda kezekshi dáriger qaraǵannan keıin demalysy qıyndaǵandyqtan, birden jansaqtaý bólimine jatqyzylǵan.
Jansaqtaý bóliminde aýyr jaǵdaıda bolǵan naýqastyń 30 mamyr kúni júregi soǵýyn toqtatty.
Bul derek koronavırýs dertiniń qaýipti ekendigin, eger der kezinde dáriger kómegine júgingen kezde ólimniń aldyn alyp, naýqastyń jazylyp ketýine múmkindigi bolǵandyǵyn kórsetedi.
Eske sala keteıik, budan buryn Batys Qazaqstanda 1200-den astam adamnyń úı karantıninde jatqanyn jazǵan bolatynbyz.
