Oralda koronavırýstan emdeıtin modýldik aýrýhana jabyldy

ORAL. QazAqparat – Oral qalasynda koronavırýstan emdeıtin 200 tósektik modýldik statsıonar jabyldy, dep habarlaıdy QazAqparat tilshisi.

BQO densaýlyq saqtaý basqarmasy málim etkenindeı, osyǵan deıin onda jatqan jalǵyz naýqas oblystyq juqpaly aýrýlar aýrýhanasyna aýystyryldy. Onyń jaǵdaıy áli de aýyr.

«Modýldik statsıonar jabylǵanymen, dárigerler kerek bolǵan jaǵdaıda jumysqa kirisýge daıyn. Qytaıda indet qaıta órship jatqandyqtan, koronavırýstyń taralý qaýpi saqtalyp otyr», dep habarlady vedomstvodan.

Basqarmadan túsken málimetke qaraǵanda, vaktsınatsııa bastalǵannan beri oblysta 276 013 adam birinshi komponentti saldyrdy. Bul – egilýge tıisti turǵyndardyń 67 paıyzy. Sondaı-aq 267 525-i (65 paıyzy) ekinshi komponentpen de egildi.

Óńirde 79 202 adam revaktsınatsııadan ótti. Pfizer kompanııasynyń vaktsınasyn 11 468 adam alsa, sonyń 428-i – júkti, 5080-i – bala emizetin áıelder, 5944-i – jasóspirimder, 16-sy – múgedekter.

Eske sala keteıik, budan buryn Batys Qazaqstanda 91 sábıdiń ata-anasy ekpeden bas tartqanyn jazǵan bolatynbyz.