Oralda koreı halqynyń Chhýsok meıramy toılandy
Óńirdegi koreı etnomádenı birlestigi uıymdastyrǵan mereke barysynda atalmysh birlestik ókilderi óz ónerlerin kórsetip, ulttyq taǵamdaryn usyndy.
Chhýsok - kúzgi jıyn-terin nemese egin oraǵy támamdalǵannan keıin toılanatyn meıram. Bul kúni koreıler ómirden ozǵan ata-analaryn eske alyp, beıit aınalasyn tazartady. Ústelge kúzgi jıyn-terin ónimderi qoıylady. Eske alý sharalary keıin ár otbasynda jalǵasady. Jalpy, koreıler de qazaqtar sııaqty aqsaqaldardyń aldyn kesip ótpeıdi. Shańyraqta kim úlken bolsa, sonyń sózine toqtaıdy.
Ulttyq merekege qatysýshylardy Qazaqstan halqy BQO assambleıasy tóraǵasynyń orynbasary Ǵaısa Qapaqov, BQO koreı etnomádenı qoǵamdyq birlestiginiń tóraǵasy Maksım Pak, «Vaınah» sheshen-ıngýsh etnomádenı birlestiginiń tóraǵasy Danılbek Saratov quttyqtap, ıgi tilekterin bildirdi.
«Mundaı sharalardyń bári el táýelsizdiginiń 25 jyldyǵyna oraı uıymdastyrylýda. Qazaqstanda barsha ult ókilderi yntymaqpen ómir súrýde. Elimiz táýelsizdik alǵannan beri Qazaqstan halqy Assambleıasy aıasynda ózge ult ókilderi óz mádenıeti men dástúrin, tilin saqtap, baıyta túsýge múmkindik aldy. Keńes dáýirinde mundaı múmkinshilik jasalǵan joq, qaıta sany az ulttardyń qysymshylyq kórgeni belgili. Osyndaı ulttyq meıramdar budan keıin de jalǵasady. Munyń bári - Elbasy saıasaty men el birliginiń arqasy», - dedi Ǵ.Qapaqov QazAqparat tilshisine.
Eske sala keteıik, jeksenbi kúni Oral qalalyq mádenıet jáne demalys saıabaǵynda ýkraın halqynyń Sorochın jármeńkesi atalyp ótilgen bolatyn.
