Oralda kópir jóndeý kezinde 47 jastaǵy jumysshy ózenge qulap qaıtys boldy

ORAL. KAZINFORM — Oral qalasynda Shaǵan ózeninen ótetin jaıaý kópirdi jóndeý-qalpyna keltirý jumystary kezinde 47 jastaǵy er adam qaza tapty.

BQO Polıtsııa departamentiniń baspasóz qyzmetinen málim etkenindeı, jazataıym oqıǵa 6 tamyz kúni boldy.

«Abaısyzda qaladaǵy jaýapkershiligi shekteýli seriktestiktiń qyzmetkeri, 1977 jylǵy er adam kópirden sýǵa qulap, batyp ketken. Oqıǵa ornynda jedel tergeý toby jumys istedi. Qazirgi kezde mán-jaıy anyqtalý ústinde», - dep habarlady.

BQO Densaýlyq saqtaý basqarmasy baspasóz qyzmetiniń málimetine qaraǵanda, jedel járdem stantsııasyna saǵat 15.29-da qońyraý shalynǵan. Oqıǵa ornyna jetken jedel járdem brıgadasy 1977 jylǵy er adamnyń qaıtys bolǵanyn naqtylady.

Atalmysh jaıaý kópir bıylǵy sý tasqyny kezinde qıraǵan bolatyn.

Eske sala keteıik, budan buryn sý tasqyny kezinde Oraldaǵy aspaly kópirde muz keptelisi bolǵanyn jazǵan edik.