Oralda kópqabatty úıdiń shatyry órtendi: 17 adam qutqaryldy
ORAL. QazAqparat - Oralda qalasynda kópqabatty úıden órt shyǵyp, 17 adam qaýipsiz jerge shyǵaryldy, dep habarlaıdy QazAqparat tilshisi.
BQO Tótenshe jaǵdaılar departamentiniń órt sóndirý jáne apattyq-qutqarý qyzmetinen alynǵan málimetke qaraǵanda, búgin, túngi saǵat 00.51-de Ábýbákir Kerderi kóshesi 191-úıdiń tóbesi janyp jatqany jóninde habar túsken.
Órt sóndirýshiler oqıǵa ornyna jetken kezde úshqabatty úıdiń shatyry otqa oranyp, oǵan qosa ǵımarattyń ishi tútinge tolǵany anyqtaldy. Úshinshi dárejeli órt qaýpi tóngennen keıin qosymsha kúsh-quraldary tartyldy.
Turǵyn úıden 17 adam kóshirildi. 1934 jylǵy zeınetker áıel jedel járdem brıgadasyna tapsyrylyp, ol keıin qalalyq kópbeıindi aýrýhanaǵa jatqyzyldy. Tún ishinde kóshirilgen turǵyndar úshin mobıldi jylytý pýnktteri uıymdastyryldy.
Tilsiz jaý saǵat 01.55-te oqshaýlanyp, 02.50-de tolyqtaı aýyzdyqtaldy. Órt sóndirýge bastapqyda 8 tehnıka, 27 adam qatyssa, keıin oǵan 9 tehnıka men 25 adam qosyldy. Órt aýmaǵy 300 sharshy metrdi qamtydy.
Qazirgi kezde órttiń shyǵý sebebi, keltirilgen shyǵyn jáne kináli adamdar anyqtalýda.
Illıýstratsııalyq foto
