Oralda kópqabatty úıden órt shyǵyp, 6 bala qutqaryldy

ORAL. QazAqparat - Oral qalasynda bes qabatty úıden órt shyǵyp, 6 bala qutqaryldy, dep habarlaıdy QazAqparat tilshisi.

BQO TJ departamentiniń baspasóz qyzmetinen túsken málimetke qaraǵanda, oqıǵa 31 mamyr kúni saǵat 10.25-te «Qurylysshy» shaǵynaýdanynda boldy.

«Tórtinshi qabatta ornalasqan balkonda jeke zattar, esik, tereze jaqtaýy otqa orandy. Órt aýmaǵy 20 sharshy metrdi qurady. Oqıǵa ornynan 7 adam evakýatsııalanyp, 2, 3, 4 jáne 5-qabattan avtosaty arqyly 6 bala qutqaryldy. Zardap shekkender joq. «Tilsiz jaý» saǵat 10-45-te oqshaýlanyp, 11.14-te sóndirildi. BQO TJ departamenti órt qaýipsizdigi erejelerin qatań saqtaý kerektigin eske salady», dep habarlady vedomstvodan.

Eske sala keteıik, budan buryn Oralda turmystyq qaldyqtar polıgonynda qoqys 4 kúnnen beri byqsyp jatqanyn jazǵan bolatynbyz.