Oralda kópqabatty úıdegi páter órtenip, 2 bala qutqaryldy
ORAL. QazAqparat – Oralda bes qabatty úıdegi órtten 32 adam qaýipsiz jerge shyǵaryldy, dep habarlaıdy QazAqparat tilshisi.
BQO TJ departamentiniń baspasóz qyzmeti málim etkenindeı, oqıǵa 3 aqpan kúni saǵat 10.18-de Aqotaý kóshesi 24/1-mekenjaıynda boldy.
Úıdiń tórtinshi qabatyndaǵy páterde jıhaz ben jeke zattar jandy. Órt aýmaǵy 15 sharshy metrdi qurady.
Oqıǵa ornynda 3 adam qutqarylsa, onyń ekeýi – bala. Er adam avtosatynyń kómegimen terezeden, 2 bala esikti buzý arqyly shyǵaryldy. Sondaı-aq 32 adam evakýatsııalansa, sonyń jeteýi – bala.
Órtti sóndirýge 35 qyzmetker 12 tehnıkamen jumyldyrylyp, «tilsiz jaý» 10.45-te oqshaýlanyp, 11.01-de tolyqtaı aýyzdyqtaldy.
Oblystyq densaýlyq saqtaý basqarmasynyń baspasóz qyzmeti naqtylaǵanyndaı, jeńil dárejede gazdan ýlanǵan 7 jáne 5 jasar qyz balalar oblystyq kópbeıindi balalar aýrýhanasyna jetkizildi. Orta dárejede gazben ýlanǵan 45 jastaǵy er adam qalalyq kópbeıindi aýrýhanaǵa aparyldy. Balalar keıin úılerine jiberildi.
Qazirgi kezde órttiń shyǵý sebebi, kináli adamdar, keltirilgen shyǵyn anyqtalý ústinde.
Eske sala keteıik, budan buryn Batys Qazaqstan oblysynda 17 eldi mekenniń elektr jaryǵynsyz qalǵanyn jazǵan bolatynbyz.
