Oralda kópqabatty úıde órt shyǵyp, 40-qa jýyq adam evakýatsııalandy

ORAL. QazAqparat – Oralda kópqabatty úıde órt shyǵyp, 40-qa jýyq adam evakýatsııalandy, dep habarlaıdy QazAqparat tilshisi.

BQO TJ departamentiniń baspasóz qyzmeti málim etkenindeı, oqıǵa 5 maýsym kúni saǵat 03.49-da Rýjeınıkov kóshesi 9-mekenjaıda ornalasqan bes qabatty úıde boldy.

Ekinshi qabattaǵy №35, №38, №39 páterler jandy.

Oqıǵa ornynan TJ departamentiniń kúshimen 5 adam qutqaryldy. Oǵan qosa 39 adam evakýatsııalansa, sonyń 19-y – bala. Oqys oqıǵadan eshkim zardap shekpedi.

«Tilsiz jaý» saǵat 05.10-da tolyqtaı aýyzdyqtaldy. Ony sóndirýge 35 qyzmetker 12 tehnıka jumyldyryldy.

Qazirgi kezde órttiń shyǵý sebebi, keltirilgen shyǵyn anyqtalyp jatyr.

Eske sala keteıik, budan buryn Oralda mas kúıinde sýǵa túsken áıeldiń qutqarylǵanyn jazǵan bolatynbyz.