Oralda kópqabatty turǵyn úı órtenip, 30 adam evakýatsııalandy
ORAL. QazAqparat – Oralda bes qabatty turǵyn úıde órt shyǵyp, 30 adam evakýatsııalandy, dep habarlaıdy QazAqparat tilshisi.
BQO TJ departamentiniń baspasóz qyzmeti málim etkenindeı, oqıǵa 19 qyrkúıek kúni saǵat 19.17-de Dáýletkereı kóshesi 31-úıde oryn aldy.
Osy úıdiń besinshi qabatyndaǵy 12-páterde jeke zattar jandy. Órt aýmaǵy 25 sharshy metrdi qamtydy.
«Tilsiz jaý» saǵat 19.36-da oqshaýlanyp, 19.50-de aýyzdyqtaldy.
Oqıǵa ornynan 30 adam shyǵarylsa, sonyń beseýi – balalar. Zardap shekken bir adam jedel járdem brıgadasyna tapsyryldy.
Qazirgi kezde órttiń shyǵý sebebi, keltirilgen shyǵyn, kináli adamdar anyqtalý ústinde. Oblystyq densaýlyq saqtaý basqarmasy baspasóz qyzmetiniń qosymsha naqtylaýynsha, 47 jastaǵy er adam oń jambasy men bileginen kúıik jaraqatyn alǵan. Ol mas kúıinde bolǵan. 43 jastaǵy er adam jeńil dárejede gazdan ýlanǵan. Ekeýi de qalalyq kópbeıindi aýrýhananyń hırýrgııalyq bólimshesine jatqyzyldy.
Eske sala keteıik, budan buryn Oralda iz-túzsiz joǵalyp ketken er adamnyń múrdesi tabylǵanyn jazǵan bolatynbyz.
