Oralda kópqabatty úılerdiń káriz júıesi nelikten bitelip qaldy — ákimdik jaýap berdi
ORAL. KAZINFORM — Oral qalasy Zachagan kentinde Aqan seri kóshesi 49/1, 47/1, 45/1 mekenjaılarynda káriz júıesiniń bitelip qalǵany jóninde turǵyndar shaǵymdandy.
Qoǵam belsendisi Muhtar Ótesovtiń Facebook áleýmettik jelisindegi paraqshasynda málim etkenindeı, turǵyndar bir aptadan beri káriz máselesinen kóz ashpaı otyr.
— Bul úılerde erekshe balalar tárbıelep otyrǵan áleýmettik jaǵynan osal toptaǵy jandar turady. Salynǵanyna eki-úsh jyl bolǵan kópqabatty úılerdiń káriz júıesi bitelip, jaǵdaı kúnnen-kúnge ýshyǵyp barady. Turǵyndar páter ıeleri kooperatıvine aıtsa, olar «Batys sý arnasy» JShS «teńgerimde joq» dep ótinishti qabyldamaıdy deıdi. Turǵyndar «Batys sý arnasy» mekemesine de qaıta-qaıta ótinish jasaǵan. Biraq jaýap bireý — bul úıler teńgerimde joq, — deıdi M.Ótesov.
Osy máselege oraı Kazinform tilshisi Oral qalasy ákimdigine arnaıy saýal joldaǵan edi.
Ákimdikten túsken málimetke qaraǵanda, Zachagan kenti, Aqan seri kóshesi, 49/1, 47/1, 45/1 mekenjaılaryndaǵy turǵyn úılerdiń qurylysyna, sondaı-aq olardyń ınjenerlik-kommýnıkatsııalyq ınfraqurylymyna tapsyrys berýshi — Oral qalasynyń qurylys bólimi.
Atalǵan jelilerdi tıisti qyzmet kórsetýshi mekeme teńgerimine berý máselesi qurylys salasyna jaýapty organ tarapynan zańnamaǵa sáıkes retteletin bolady.
— Turǵyndardyń jaǵdaıyn eskere otyryp, 2026 jylǵy 26 naýryzda Oral qalasynyń qurylys bólimi tarapynan atalǵan mekenjaıda jedel tazalaý jumystary uıymdastyryldy. Arnaıy assenızator tehnıkasy men «Krot» qurylǵysynyń kómegimen káriz júıesi tolyq tekserilip, tazartyldy. Tekserý nátıjesinde turǵyndar tarapynan turmystyq qaldyqtardyń tastalýy káriz júıesiniń bitelýine negizgi sebep retinde anyqtaldy. Qazirgi tańda káriz júıesiniń jumysy tolyq qalpyna keltirildi. Oral qalasynyń ákimdigi ınjenerlik ınfraqurylym nysandarynyń jaǵdaıyn turaqty baqylaýda ustaıdy. Osy rette turǵyndardy káriz júıesin paıdalaný talaptaryn saqtaýǵa jáne turmystyq qaldyqtardy arnaıy oryndarǵa tastaýǵa shaqyramyz, — delingen resmı jaýapta.
Eske sala keteıik, budan buryn Oralda káriz sýynyń Shaǵan ózenine quıylyp jatqany ras pa, sony jazǵan bolatynbyz.
