Oralda kópqabatty úıde órt shyǵyp, 17 jastaǵy qyz ýlanyp qaldy

ORAL. KAZINFORM – Oral qalasynda tórt qabatty turǵyn úıde órt shyǵyp, 17 jastaǵy qyz qutqaryldy.

BQO TJ departamentiniń baspasóz qyzmetinen málim etkenindeı, oqıǵa búgin tańmen Ábilqaıyr han dańǵyly boıynda ornalasqan № 14 turǵyn úıde boldy.

- Tórtinshi qabattaǵy páter otqa oranǵan. Oqıǵa ornyna jetken órt sóndirý jasaǵy 2008 jylǵy qyzdy qutqardy. Kórshi páterden taǵy bir adam evakýatsııalandy. Órt sóndirý bólimsheleri kelgenge deıin 10 adam, sonyń ishinde 2 bala ózderi kóshege shyqty. Aýmaǵy 20 sharshy metrdi qamtyǵan órt jedel sóndirildi. Qyz bala jedel járdem brıgadasyna tapsyryldy. Qazirgi kezde órttiń shyǵý sebebi, keltirilgen shyǵyn anyqtalý ústinde, - dep habarlady vedomstvodan.

BQO densaýlyq saqtaý basqarmasy baspasóz qyzmetiniń naqtylaýynsha, órt bolyp jatqany jóninde habar saǵat 09.05-te túsken.

Jedel járdem brıgadasymen aýyr dárejede ýlanǵan 17 jastaǵy qyz oblystyq kópbeıindi balalar aýrýhanasyna jetkizildi. Dárigerler patsıentti dereý anestezıologııa jáne qarqyndy terapııa bólimshesine jatqyzdy. Qazirgi ýaqytta jaǵdaıy turaqtandy. Pýlmonologııa bólimshesine aýystyrylatyn bolady.

Eske sala keteıik, budan buryn Oralda ózenge batyp ketken avtokólikten eki er adamnyń denesi tabylǵanyn jazǵan edik.