Oralda kópqabatty úı turǵyndary tóbeden sý ketetinin aıtyp shaǵymdandy
ORAL. KAZINFORM — Oral qalasynda Abaı dańǵyly102-mekenjaıynda ornalasqan kópqabatty úıdiń tóbesinen nóser jaýynnan keıin sý ketkendigi jóninde áleýmettik jelide beınejazba jarııalandy.
Turǵyndardyń sózine qaraǵanda, bul joly burynǵy jataqhananyń tóbesinen ketken sý birinshi qabatqa deıin jetken.
— Sý bólmelerge kirip jatyr. Jańbyr jaýǵan saıyn osyndaı jaǵdaıǵa tap bolamyz. Oral qalasy turǵyn úı-kommýnaldyq sharýashylyǵy, jolaýshy kóligi jáne avtomobıl joldary bólimine ótinish jazǵanbyz. Kútińizder deıdi, kóp ýaqyt ótti, paıda joq, — deıdi turǵyndar.
Osyǵan oraı Kazinform tilshisi Oral qalasy ákimdigine arnaıy saýal joldaǵan edi.
Ákimdikten túsken málimetke qaraǵanda, Oral qalasy turǵyn úı-kommýnaldyq sharýashylyǵy, jolaýshy kóligi jáne avtomobıl joldary bóliminiń mamandary buǵan deıin birneshe ret baryp, turǵyndarmen jınalys ótkizgen.
— Óz menshikteri bolǵan soń turǵyndar qarjy jınap, jóndeý jumystaryn júrgizýi kerek. Nemese turǵyn úı-kommýnaldyq sharýashylyqty jańǵyrtý baǵdarlamasyna qatysýyna bolady. Bul baǵdarlama oblystyq energetıka, turǵyn úı-kommýnaldyq sharýashylyq basqarmasy arqyly júzege asyrylady. Jańǵyrtý arqyly shatyrdy túgeldeı aýystyrýǵa bolady. Taıaýda atalǵan bólim mamandary turǵyndardy qaıtadan jınap, úıdi jóndeýdiń tetikterin túsindiredi, — delingen resmı málimette.
Eske sala keteıik, budan buryn Oralda jóndeýge jabylǵan kópirdiń qashan ashylatyny belgili bolǵanyn jazǵan edik.
