Oralda kópirden sekirip ketken qyzdy polıtsııa qyzmetkerleri qutqardy
ORAL. QazAqparat – Oralda kópirden sekirip ketken qyzdy polıtsııa qyzmetkerleri qutqardy, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen túsken málimetke qaraǵanda, oqıǵa 12 naýryz kúni Derkól aýyly tusyndaǵy Shaǵan ózeninen ótetin kópirde boldy.
32 jastaǵy qyz ózine-ózi qol jumsamaq bolyp, kópirden sekirip ketken. Bul jóninde saǵat 20.30-da belgisiz bireý 102 telefonyna habarlaǵan.
Sol aýmaqta kezekshilikte júrgen Oral qalasy polıtsııa basqarmasy patrýldik polıtsııa batalonynyń qyzmetkerleri, polıtsııa leıtenanty Parasat Jolbaev pen polıtsııa aǵa leıtenanty Erlan Qojasov oqıǵa ornyna dereý jetedi. Aınalany barlap, saıajaı turǵyndarynan qaıyq surastyrady. «Sýǵa adam qulap ketti, kómektesý kerek» degennen keıin turǵyndardyń biri qaıyǵyn beredi.
Polıtsııa qyzmetkerleri ózenniń ortasynda denesi sý betinde qalqyp turǵan qyzǵa deıin qaıyqpen júzip jetip, ony kópir astyndaǵy beton tasqa deıin jetkizedi.
Qyzdyń áli de tiri ekenin bilgen olar alǵashqy kómek kórsetip, arqasynan qaǵyp, ishindegi sýdy shyǵarady.
Keshikpeı qutqarýshylar da, jedel járdem de jetedi. Polıtsııa qyzmetkerleri qyzdy qaıyqqa salyp, jaǵaǵa deıin jetkizip, dárigerlerdiń qolyna tapsyrady.
Qazirgi ýaqytta qyzdyń jaǵdaıy birqalypty.
