Oralda kópbalaly áıeldi qaǵyp ketken burynǵy polıtsııa qyzmetkeri 5 jylǵa sottaldy
ORAL. QazAqparat - Búgin Oral qalalyq sotynyń úkimimen Samat Naýryzov QR 345-baby 3-bóligine sáıkes (adam ólimine soqtyrǵan kólik quralyn paıdalaný erejesin buzý) aıypty dep tanylyp, bes jylǵa bas bostandyǵynan aıyrý jazasyn qaýipsizdigi tómen qylmystyq-atqarý júıesi mekemesinde (qonys kolonııasynda) óteýge sottaldy, dep habarlaıdy «QazAqparat» tilshisi.
Sonymen qatar jábirlenýshi taraptyń azamattyq talap-aryzy ishinara qanaǵattandyrylyp, 8 mln. teńge moraldyq zalal, sondaı-aq marqumnyń qyzy Sandýǵashtyń emdelýi men basqa shyǵyndar esebinde 2 mln teńge óndirildi. Oǵan qosa S.Naýryzov aıdaǵan avtokóliktiń saqtandyrý polısi jalǵan bolýyna baılanysty jeke qaýly shyǵaryldy.
Eske sala keteıik, 22 shilde kúni saǵat 15.00-der shamasynda buryn ishki ister organynda qyzmet atqarǵan S.Naýryzov Zachagan kentindegi Qambar batyr kóshesi boıynda «Albına» meıramhanasynyń qasynda jol janynda turǵan 42 jastaǵy Aıgúl Súleımenova men onyń baýyryna salǵan qyzy Sandýǵashty Hyundai Tucson avtokóligimen qaǵyp ketken bolatyn. Sonyń saldarynan áıel oqıǵa ornynda kóz jumsa, aýyr jaraqat alǵan 1995 jylǵy Sandýǵash aýrýhanaǵa jetkizilgen edi. Aıgúldiń sońynda bes balasy (baýyryna basqan qyzy Sandýǵashtan basqa tórt uly) jetim qaldy.
Týystarynyń sózine qaraǵanda, qoly (shyntaǵy) men aıaǵyna eki ret ota jasalǵan Sandýǵashtyń jaǵdaıy áli de onsha emes, qazir baldaqpen júr. Aıaǵy bitkennen keıin qaıta ashyp, temirin alady.
