Oralda qonjyq qaıdan júr
NUR-SULTAN. QazAqparat - Oral qalasyndaǵy kóppáterli turǵyn úıdiń balkonynda júrgen qonjyqtyń qaıdan kelgeni anyqtaldy. Bul jaıynda QR AShM Orman sharýashylyq jáne janýarlar álemi komıtetiniń baspasóz hatshysy Sáken Dildahmet Facebook-tegi paraqshasynda jazdy, dep habarlaıdy QazAqparat tilshisi.
«Batys Qazaqstan oblystyq orman sharýashylyǵy jáne janýarlar álemi aýmaqtyq ınspektsııasynyń aqparatyna sáıkes, 9 mamyr kúni shamamen saǵat 21-39-da «102» pýltine kýágerler habarlasyp, Nazarbaev dańǵyly boıyndaǵy 196 úıdiń 2 qabatyndaǵy balkonda qonjyq júrgenin aıtqan. Atalǵan meken jaıǵa kelgen polıtsııa qyzmetkeri aqparattyń rastyǵyna kóz jetkizgen. Mán-jaıdy anyqtaý barysynda Aqtaý qalasynyń turǵyny azamat M.Talasbaev qonjyqtyń barlyq qujattaryn kórsetken», - dep jazdy ol.
Onyń atap ótýinshe, suraý salý barysynda azamat M.Talasbaev tsırkke usyný maqsatynda qońyr qonjyqty ósirý úshin 8 mamyr kúni Reseıdiń Ýfa qalasynan satyp alǵanyn aıtqan. Oralǵa kelgennen qonjyqty jersindirý úshin sol qalada qonýǵa sheshim qabyldaǵan.
«Osydan keıin Nazarbaev dańǵyly 196 úıden ýaqytsha páter jaldap, ózine jáne qonjyqqa tamaq alý úshin syrtqa shyǵyp ketken. Páterde qalǵan qonjyq balkonǵa shyǵyp ketip, adamdardy úreılendirgen. Qylmystyq jáne ákimshilik buzýshylyqtyń oryn almaǵandyǵyn eskerip, materıal protsessýaldy sheshim qabyldaýsyz qaldyryldy», - dedi Sáken Dildahmet.
Buǵan deıin Oralda kóp qabatty úıdiń balkonynda júrgen qonjyq jurtty tańdandyrǵanyn jazǵan edik.
