Oralda kondýktor mas kúıinde avtobýs júrgizemin dep jeńil kólikti soqty
ORAL. QazAqparat - «QazAqparat» budan buryn habarlaǵanyndaı, 14 mamyr kúni keshkisin Oralǵa qarasty Zachagan kentindegi №6 emhana mańynda №7 baǵytpen júretin «PAZ» jolaýshylar avtobýsy men «Mersedes» avtokóligi soqtyǵysqan bolatyn.
BQO ishki ister departamenti jergilikti polıtsııa qyzmetiniń basshysy, polıtsııa polkovnıgi Manarbek Ǵabdýllınniń búgin tolyqtyrǵanyndaı, júrgizýshi úıinde qalǵan da, avtobýs rýlinde kondýktor bolǵan. Ol ishinde jolaýshylary joq avtobýsty avtoturaqqa qoıamyn dep bara jatyp, qarsy betke shyǵyp ketip, «Mersedespen» soqtyǵysýǵa jol bergen. Jol-kólik oqıǵasy saldarynan «Mersedestegi» júrgizýshimen qosa tórt adam jáne kondýktor jeńil jaraqat alǵan. Olar keıin úılerine jiberilgen. 28 jasar kondýktordyń júrgizýshi kýáligi joq ári jeńil dárejede mas kúıinde bolǵan. Sondaı-aq ol sol avtobýstyń ıesi kórinedi.
«Qazirgi kezde materıaldar jınaqtalý ústinde, is sotqa beriletin bolady. Kondýktor ákimshilik qamaýǵa alynýy múmkin. Avtobýs rýlin kólik júrgizýshilik quqyǵy joq adamǵa bergen júrgizýshi máselesin de sot sheshedi», dedi M.Ǵabdýllın.
