Oralda kompozıtor Jaskeleń Ǵaısaǵalıevtiń ánderin oryndaýshylardyń baıqaýy márege jetti
ORAL. QazAqparat - Oralda Qazaqstan Kompozıtorlar odaǵynyń múshesi, ánshi Jaskeleń Ǵaısaǵalıevtiń týyndylaryn oryndaýshylardyń «Án - mahabbat» estradalyq baıqaýy márege jetti, dep habarlaıdy QazAqparat tilshisi.
«Rýhanı jańǵyrý» baǵdarlamasy aıasynda «Eren eńbegi úshin» medali men «Mádenıet salasynyń úzdigi» tósbelgisiniń ıegeri J.Ǵaısaǵalıevtiń elý jasqa tolýyna oraı alǵash ret uıymdastyrylǵan óner dodasyna Batys Qazaqstan, Aqtóbe, Atyraý oblystarynan barlyǵy 29 úmitker qatysyp, baq synady.
Ekinshi kezeńge 15 ánshi ótip, solardyń arasynan jeńimpaz-júldegerler anyqtaldy.
«Nur Otan» partııasy oblystyq fılıaly ǵımaratynyń zalynda ótken marapattaý rásiminde BQO ákiminiń orynbasary Ǵabıdolla Ospanqulov týǵan jerin talmaı ánge qosyp kele jatqan kompozıtorǵa rızashylyǵyn bildirip, QR Mádenıet jáne sport mınıstri Arystanbek Muhamedıuly men óńir basshysy Altaı Kólginovtiń alǵyshattaryn tabys etti.
Qazylar alqasynyń tóraǵasy, Qazaqstannyń eńbek sińirgen qaıratkeri, «Qurmet» ordeniniń ıegeri, ánshi-kompozıtor Donedil Qajymovtyń aıtýynsha, fınalǵa ótken oryndaýshylar bir-birimen deńgeıles bolyp, márege quıryq tistese jetti.
«Men Aqtóbe qalasynyń týmasy bolǵanymmen, Aq Jaıyqqa alǵash ret aıaq basyp turmyn. Ǵarıfolla Qurmanǵalıev, Bazarbaı Jumanııazov, Eskendir Hasanǵalıev syndy birtýar óner sańlaqtarynyń jolyn jalǵastyryp kele jatqan Jaskeleńniń aldaǵy ýaqytta da jaqsy ánder jaza berýine tilektespin. Óner toıy tarqamasyn!», dedi Almatydan arnaıy kelgen qazylar alqasynyń múshesi, belgili kompozıtor, «Qurmet» ordeniniń ıegeri Beıbit Oraluly.
Sonymen, eki kúnge sozylǵan án báıgesinde aqtóbelik Ernar Altynov bas júldeni jeńip aldy. Bórli aýdanynan kelgen Ásel Kýdjanova birinshi, syrymdyq Bekeı Qanatov pen oraldyq Medet Orazov ekinshi, «Іnjý» toby, oraldyq Rýstam Hafızov jáne aqjaıyqtyq Venera, Ánýar Nurǵalıevter úshinshi orynǵa ıe boldy. Birneshe ánshi dıplomant atansa, basqalaryna alǵyshattar tabys etildi.
Shara baıqaý júldegerleri men qonaqtarynyń gala-kontsertine ulasty. Onda Jaskeleń Ǵaısaǵalıevtiń ózi de ánderin oryndap, kópshilik qoshemetine bólendi.
«Kompozıtorlardan kórermender qaı týyndyńdy bıik qoıyp, bóle-jara atar ediń? degen saýaldar qoıyp jatady. Men úshin «Aq Jaıyqtyń aq shaǵalasy» atanǵan Aqushtap Baqtygereevanyń sózine jazylǵan «Josaly» ánimniń jóni bólek. Ár talant ta óz óneriniń bastaýyn týǵan jerinen, ata-baba topyraǵynan alady. Endeshe, Syrym aýdanyndaǵy Josaly aýyly da men úshin sondaı, árqashan júregimniń tórinde turady», dedi J.Ǵaısaǵalıev.
