Oralda kompozıtor Temiráli Baqtygereevti eske alý keshi ótti
ORAL. QazAqparat - Batys Qazaqstan oblystyq qazaq drama teatrynda belgili kompozıtor Temiráli Baqtygereevti (1950-2014) eske alýǵa arnalǵan «Baryp qaıt, balam, aýylǵa» atty shyǵarmashylyq kesh ótti, dep habarlaıdy «QazAqparat» tilshisi.
Qaztalov aýdany qazirgi Qaıyńdy aýylynda dúnıege kelgen Temiráli Baqtygereev 1967 jyly orta mektepti támamdaǵannan keıin Alataýǵa bet alyp, P.Chaıkovskıı atyndaǵy Almaty mýzyka ýchılışesin, 1993 jyly QazMUÝ-diń jýrnalıstıka fakýltetin syrttaı bitirgen. Saratov qalasyndaǵy L.Sobınov atyndaǵy konservatorııada bilim alǵan ol 1970 jyly baıanshy retinde Orta Azııa áskerı án-bı ansamblin qurýǵa qatysqan.
Kompozıtordyń «Baryp qaıt, balam, aýylǵa» (óleńin jazǵan Aısulý Qadyrbaeva), «Ǵashyqtar senimi» (Jeńis Qashqynov), «Saǵynysh» (Farıza Ońǵarsynova) syndy ánderi elge keńinen tanyldy. Úsh júzden astam án jazǵan kompozıtor 2004 jyly jol apatynan keıin múgedek bolyp, tósekke tańyldy. Tirisinde adamdar tarapynan da qysastyq kórdi. 1990 jyly Kompozıtorlar odaǵyna alynsa da, keıin «mýzykalyq bilimi joq» degen syltaýmen shyǵaryp tastaıdy. Múgedek bolǵan soń da eleýsiz qaldy. Degenmen 2013 jyly ánshi, Qazaqstannyń eńbek sińirgen ártisi Sulýshash Nurmaǵambetova syndy janashyr adamdardyń uıymdastyryp, qoldaýymen Almatyda úlken shyǵarmashylyq keshi ótip, kompozıtorǵa «Mádenıet salasynyń úzdigi» tósbelgisi tabys etildi. Bir jyldan keıin Temiráli Baqtygereev baqılyq bolǵanymen, sońynda halqymen birge jasaıtyn týyndylary qaldy.
Oralda ótken keshte batysqazaqstandyq ánshiler Saǵadat Rahmetjanov, Jaskeleń Ǵaısaǵalıev, Jańylsyn Hasanova, Darhan Qulbabaev, Aıbar Qaıyrhanov, Aıdana Ájiǵalıeva jáne basqa ónerpazdarmen qatar Almatydan arnaıy kelgen Meıramgúl Orasheva, Saıat Medeýov, Sulýshash Nurmaǵambetova jáne Nurlan Ónerbaev kompozıtor týyndylaryn oryndap, kópshilik qoshemetine bólendi.
«Ótken ǵasyrdyń sekseninshi jyldary qazaq óneriniń qara shańyraǵy - Muhtar Áýezov atyndaǵy teatrda akter bolyp júrdim. Sol kezde Temiráli Baqtygereev dybys operatory bolyp qyzmetke turdy. Meniń spektaklderde án salyp, gıtarany qolǵa ustap, úırenip júrgenimdi baıqaǵan ol: «Nurlan, gıtaramen án salǵyń kele me, mende jaqsy án bar», dedi. Sosyn ekeýmiz stýdııada otyryp, osy «Saǵynysh» ánin oryndadym. Sóıtip meniń gıtaramen alǵash aıtqan ánim «Saǵynysh», birinshi kompozıtorym Temiráli Baqtygereev edi. Ol meniń sodan keıingi aıtatyn ánderimniń janryn aıqyndap berdi. ıAǵnı qandaı ánge beıim ekenim osy «Saǵynyshtan» belgili boldy. Temiráliniń dosyna, ónerge degen adaldyǵy, qarapaıymdylyǵy, kishipeıildiligi búginde saǵynyshqa aınaldy. Onyń shyǵarmashylyq keshteri Almatyda boldy. Alaıda kompozıtor týǵan jerimde, óz ólkemde án keshimdi ótkizsem dep aýzynan tastamaı, aıtyp otyratyn. Búgin sol armanyn biz oryndap otyrmyz», dedi Qazaqstannyń eńbek sińirgen qaıratkeri Nurlan Ónerbaev.
Keshke qatysýshylardy oblys ákiminiń birinshi orynbasary Arman Óteǵulov quttyqtap, kompozıtordyń zaıyby Jámılaǵa, «Baryp qaıt, balam, aýylǵa» óleńiniń avtory, aqyn Aısulý Qadyrbaeva, ánshi Sulýshash Nurmaǵambetovaǵa qurmet kórsetti.
