Oralda komıssııa ákimdiktiń apparat basshysyna zańsyz páter bergen

ORAL. KAZINFORM — QR Memlekettik qyzmet isteri agenttiginiń BQO-daǵy Ádep keńesiniń otyrysynda birqatar memlekettik qyzmetshilerdiń tártiptik isi qaraldy.

Oral qalasy ákimi apparatynyń basshysy Altaı Qulqaevqa zańsyz páter bólgen komıssııa músheleri, qala ákiminiń orynbasary Jandos Dúısenǵalıev, qarjy bóliminiń basshysy Erbol Shúkirǵalıev, turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimi basshysynyń orynbasary Almat Ashıkov jáne qala ákimi apparaty biryńǵaı memlekettik-quqyqtyq jumystar qyzmeti bóliminiń basshysy Álıhan Myńjasarovqa qyzmetine tolyq sáıkes emestigi jóninde eskertý jasaldy.

Oral qalasy prokýratýrasynan túsken málimetke qaraǵanda, A.Qulqaevqa bıylǵy 28 naýryzda qyzmettik páter berilgen.

Shyn mánisinde A.Qulqaevtyń ýákiletti organda jalǵa beriletin turǵyn úı berý kezeginde turmaǵany anyqtaldy. 

Sonymen qatar ol jekeshelendirilgen qyzmettik páterin 2021 jyldyń 16 qyrkúıeginde syıǵa tartyp, ıelikten shyǵarǵan, osylaısha, turmystyq jaǵdaıyn ádeıi nasharlatqan.

Soǵan qaramastan A.Qulqaev muqtaj dep tanylyp, oǵan qyzmettik páter berilgen. Keıin ol bul páterin memleket menshigine qaıtarǵan.

Ádep keńesiniń otyrysynda sondaı-aq Oral qalasy jer qatynastary bólimi basshysynyń orynbasary Áshimhan Jalmuhanovtyń isi qaralyp, ol da tártiptik jaýapkershilikke tartyldy.

Eske sala keteıik, budan buryn BQO-da Ádep kodeksiniń talaptaryn buzǵan prokýratýra qyzmetkeriniń jaýapqa tartylǵanyn jazǵan bolatynbyz.