Oralda kollektor jarylyp, qalanyń bir bóligi sýsyz qaldy
ORAL. QazAqparat - Oralda kollektor jarylyp, qalanyń bir bóligi sýsyz qaldy, dep habarlaıdy QazAqparat tilshisi.
Oral qalasy ákimdiginen túsken málimetke qaraǵanda, oqıǵa keshe oryn aldy.
Derkól aýylyndaǵy №19A káriz sorǵy stansasynda dıametri 800 mm káriz kollektory jarylǵan. Sonyń saldarynan qalanyń soltústik-shyǵys, ishinara ortalyq bóligi jáne Zachagan kenti sýsyz qaldy.
Jóndeý-qalpyna keltirý jumystaryn «Batys sý arnasy» JShS 70 adam, 39 tehnıkanyń kúshimen júrgizýde.
Káriz sorǵy stansasyndaǵy apatty joıý jumystary táýlik boıy atqarylýda. Qalanyń eski jáne ortalyq bóligine, Zachagan kentine sý berildi.
«Qazirgi kezde qalanyń soltústik-shyǵys bóligi sýsyz qalyp otyr. Osy aýdandaǵy 15 ýchaskedegi áleýmettik nysandar men turǵyndarǵa tańerteń sý tasymaldaý uıymdastyrylatyn bolady», dep habarlady QazAqparat tilshisine Oral qalasy ákimdiginen.
