Oralda kolledj stýdenti sıntetıkalyq esirtki men gashısh satyp kelgen
«Onyń turǵylyqty jerin tintý barysynda bólshektep salynǵan «Alfa PVP» sıntetıkalyq esirtki zaty jáne gashısh tabyldy. Odan esirtki zattarynan bólek, birneshe uıaly telefon, banktik kartalar, elektrondy tarazy jáne býyp-túıýge arnalǵan materıaldar alyndy», - dedi mınıstrlikten.
Tergeý barysynda belgili bolǵanyndaı Oraldyń 19 jastaǵy turǵyny tanymal messendjer arqyly esirtki saýdasyn uıymdastyrǵan. Satýǵa arnalǵan esirtkini ınternet arqyly tapsyrys berip, ony júzbe-júz kezdesýdi qajet etpeıtin jolmen alyp otyrǵan. Sodan keıin esirtkini óz páterinde bólip, býyp, belgili bir jerge jasyryp ketý arqyly taratqan.
Kúdiktiniń telefonynan esirtki jasyrylǵan barlyq mekenjaılar, geobelgiler jáne fotolar alyndy. Sońǵy eki aıda Oral jáne Aqtóbe qalalarynda barlyǵy 50-ge jýyq jasyrylǵan oryn anyqtalǵan.
«QR QK-niń 296-baby 4-bóligi boıynsha (esirtki zattardy, psıhotropty zattardy ótkizý maqsatynda zańsyz daıyndaý, qaıta óńdeý, alý, saqtaý, tasymaldaý, jóneltý nemese ótkizý) sotqa deıingi tergeý bastaldy. Qazirgi ýaqytta esirtkini belgili bir orynǵa jasyryp ketý fýnktsııasyn júzege asyrǵan tulǵalardy anyqtaý, dáleldemelik bazany bekitý jáne QR QK-niń 297-babynyń 4-bóligi boıynsha (esirtkini elektrondy aqparattyq resýrstardy paıdalaný arqyly ótkizý) jańa aıyp taǵý úshin tergeý-jedel is-sharalary júrgizilýde», - dedi vedomstvodan.
Eske sala keteıik, 11 qańtarda esirtkini elektrondy aqparattyq resýrstardy paıdalaný arqyly ótkizgeni úshin jaýapkershilikti kózdeıtin qylmystyq zańanamadaǵy ózgerister kúshine endi. Endigide bul qylmys úshin múlkin tárkileýmen 10 jyldan 15 jylǵa deıin bas bostandyǵynan aıyrý kózdeledi.
