Oralda kólik qaǵyp ketken 7 jastaǵy qyz qaza tapty
ORAL. KAZINFORM — Oral qalasynda avtokólik 1970 jylǵy áıel men 2019 jylǵy qyzdy qaǵyp ketti.
BQO polıtsııa departamentiniń baspasóz qyzmetinen málim etkenindeı, oqıǵa 6 shilde kúni shamamen saǵat 19.40-ta boldy.
Júrgizýshi Mitsubishi Outlander avtokóligimen Ábilqaıyr han dańǵylymen kele jatyp, D.Qonaev shaǵynaýdany 67-úı tusynda jol qozǵalysy qaýipsizdigin qamtamasyz etpegen. Sóıtip belgilenbegen jerden júgirip ótip bara jatqan eki jaıaý júrginshini qaǵyp ketken.
Saldarynan 1970 jylǵy áıel men 2019 jylǵy qyz bala túrli dene jaraqattarymen qalalyq kópbeıindi aýrýhanaǵa jetkizildi. Keıin 7 jastaǵy qyz kóz jumdy.
— Atalǵan derek boıynsha QR Qylmystyq kodeksi 345-baby 3-bóligine sáıkes sotqa deıingi tergeý amaldary júrgizilýde. Jan-jaqty tergeý qorytyndysyna sáıkes zańdy protsessýaldyq sheshim qabyldanady. Basqa aqparat QR Qylmystyq is júrgizý kodeksiniń 201-babyna sáıkes jarııalaýǵa jatpaıdy, — dep habarlady vedomstvodan.
Áleýmettik jeliden málim bolǵanyndaı, jol apatyna ájesi men nemeresi ushyraǵan. Qazirgi kezde qyzdyń týma-týysqandary atalmysh jol-kólik oqıǵasynyń kýágerleri men beınejazbasy bar júrgizýshilerdi izdestirip jatyr.
Eske sala keteıik, budan buryn Batys Qazaqstanda jol apatynan eki polıtsııa qyzmetkeri kóz jumǵanyn jazǵan edik.
